अखबार नेपाल ट्रेन्डिङ

काठमाडौं: प्रधानमन्त्री बालेन्द्र शाहले सिंहदरबारस्थित प्रधानमन्त्री तथा मन्त्रिपरिषद्को कार्यालयमा ‘जेन-जी’ उमेर समूहका युवा सांसदहरूसँग विशेष अन्तरक्रिया कार्यक्रम सुरु गरेका छन् । युवा जनशक्ति, प्रविधि र समसामयिक विकासका एजेन्डामा केन्द्रित उक्त बैठकमा विशेष गरी नवीन प्रविधि र डिजिटल सुशासन, युवा स्वरोजगार तथा स्टार्टअप नीति, प्राविधिक शिक्षा, सर्वसुलभ स्वास्थ्य सेवा र वातावरणीय सन्तुलनसहितको दिगो विकासका विषयमा गहन छलफल भएको छ ।

प्रधानमन्त्री शाहले युवा पुस्ताका जनप्रतिनिधिहरूका नवीन सोच, जनअपेक्षा तथा प्रत्यक्ष अनुभवलाई सरकारी नीति निर्माण र बजेट कार्यान्वयनको दायरामा कसरी प्रभावकारी रूपमा ढाल्न सकिन्छ भन्ने विषयमा सांसदहरूसँग सुझाव माग गरेका छन् । बैठकमा सहभागी युवा सांसदहरूले प्रविधिमैत्री सरकारी सेवा, नवप्रवर्तनका लागि सहज ऋण तथा अनुदान, अनुसन्धानमा लगानी र जलवायु परिवर्तनका असर न्यूनीकरण गर्ने रणनीतिबारे आ-आफ्नो धारणा प्रस्तुत गरेका छन् । युवा पुस्ताको आकांक्षा अनुकूल सुशासन र विकासका प्राथमिकता निर्धारण गर्न प्रधानमन्त्री शाहले जेन्जी प्रतिनिधिहरूसँगको संवादलाई निरन्तरता दिने रणनीति अपनाएका छन् ।