अखबार नेपाल ट्रेन्डिङ

काठमाडौं: नेपाललाई टाइब्रेकरमा ५-३ गोल अन्तरले हराउँदै जोर्डनले वाफ वुमन्स च्याम्पियनसिपको उपाधि जितेको छ । बिहीबार राति भएको फाइनलमा खेलको पहिलो हाफमा १-० को अग्रता बनाए पनि नेपालले दोस्रो हाफमा त्यसलाई कायम राख्न सकेन । ७३औँ मिनेटमा जोर्डनकी लाना फेरसले गोल गर्दै जोर्डनलाई खेलमा फर्काएकी थिइन् ।

अल फैसल रंगशालामा खेलमा सविता रानामगरले गोल गर्दै नेपाललाई अग्रतामा राखेकी थिइन् । खेलको २९औँ मिनेटमा रेखा पौडेलको पासलाई सदुपयोग गर्दै सविताले उत्कृष्ट गोल गरेकी थिइन् । ८८औँ मिनेटमा साराह अबु सबाहले गोल गर्दै जोर्डनलाई २–१ को अग्रतामा राखेकी थिइन् ।

खेलको अतिरिक्त समयमा पाएको पेनाल्टीलाई गीता रानाले सदुपयोग गर्दै नेपाललाई पुनस् २–२ को बराबरीमा फर्काएकी थिइन् । नेपालकी स्टार स्ट्राइकर सावित्रा भण्डारीको अनुपस्थितिमा खेलेको नेपालले अर्की खेलाडी प्रिती राईलाई पनि गुमायो । उनी चोटग्रस्त हुँदै मैदान बाहिर जानु परेको थियो । अन्तः खेल पेनाल्टी सुट आउटमा पुग्यो ।

जोर्डनबाट पेनाल्टी प्रहारका लागि आएका आयह अल मजाली, मास्या जेबाराह , नोउर जकास, सारह अबु सबाह र रोजबहान फ्राइजले गोल गरे । नेपालका गीता राई, दीपा शाही, हीराकुमारी भुजेलले गोल गर्दा अमृता जैसीको प्रहार भने जोर्डनका गोलकिपरले बिफल बनाइन् ।

प्रतियोगिताकै सबैभन्दा सफल टिम जोर्डनले सेमिफाइनलमा प्यालेस्टाइनलाई हराउँदै फाइनल यात्रा तय गरेको थियो । जोर्डनले छैटौँ पटक उपाधि हात पारेको हो । यसअघि उसले सन् २००५ र २००७ मा दुई तथा सन् २०१४, १९ र २२ मा उपाधि उचालेको छ ।

साबित्रा बनिन् सर्वाधिक गोलकर्ता

सावित्रा भण्डारी वाफ वुमन्स च्याम्पियनसिपकी सर्वाधिक गोलकर्ता बनेकी छिन् । प्रतियोगिताको फाइनल गुमाएकी सावित्राले वाफ वुमन्स च्याम्पियनसिपमा सर्वाधिक ९ गोल गरिन् । सावित्रालाई पछ्याएकी जोर्डनकी मायासा जबराह ५ गोल गर्दै दोस्रो स्थानमा रहिन् ।

सावित्राले समूह चरणमा सिरियाविरुद्ध एक गोल गरेकी थिईन् । दोस्रो खेलमा इराकविरुद्ध उनले ५ गोल गरिन् । तेस्रो खेलमा प्यालेस्टाईनविरुद्ध सावित्राले दुई गोल गरेकी थिईन् । सेमिफाइनलमा लेवनानविरुद्ध बराबरी गोल फर्काएकी सावित्राले फाइनल खेल्न भने पाईनन् । फाइनल खेलको समय फिफा विन्डो डेट भन्दा बाहिर रहेकाले सावित्राले जोर्डनविरुद्धको निर्णायक खेल भने गुमाउन पुगेकी थिईन् ।