अखबार नेपाल ट्रेन्डिङ

काठमाडौं: नेपाली राष्ट्रिय महिला फुटबल टीमका फरवार्ड साबित्रा भण्डारी ‘साम्बा’ फ्रान्सको शीर्ष डिभिजनको क्लबमा अनुबन्धित भएकी छिन् । साम्बा नामले एसियाली फुटबलमा परिचित साबित्रालाई फ्रान्सेली शीर्ष डिभिजनको क्लब अन अभान्ट गिन्गेम्पले अनुबन्ध गरेको हो ।

क्लबले उनलाई सामाजिक सञ्जालमार्फत बिहीबार राती सार्वजनिक गरेको छ । युरोपेली क्लब फुटबलको शीर्ष डिभिजनको लिग खेल्ने सावित्रा पहिलो खेलाडी हुन् । उनले यसअघि युरोपेली लिगको रुपमा इजरायलबाट ब्यवसायिक यात्रा सुरु गरेकी थिईन् । उनी इजरायलको क्लब हापोएल रानानासँग अनुबन्धित भएकी थिईन् । छोटो समयमै इजरायली क्लबमा उनले प्रभाव देखाएकी थिईन् ।

युद्धका कारण इजरायली फुटबल प्रभावित बनेपछि सावित्रा नेपाल फर्किएकी थिईन् । इजरायलको क्लब फुटबलमा सावित्राको प्रभाव देखेर फ्रान्सेली क्लबले उनलाई अनुबन्धन गर्न तयार भएको हो । उनको क्लब अन अभान्टले फ्रान्सको शीर्ष डिभिजनको लिग खेल्ने गर्छ ।

क्लबले सावित्राको अनुबन्धन घोषणा गरेसँगै अब शनिबार हुने लिग खेलका लागि उनी छनोट हुने सम्भावना छ । अंक तालिकाको तल्लो भागमा रहेको ग्वेंगाम्पले बोर्डोको सामना गर्दैछ । ग्वेंगाम्प लिगको १२ खेलमा २ जित, २ बराबरी र ८ हारका साथ ८ अंक जोड्दै दशौं स्थानमा छ । बोर्डोको १२ खेलमा ५ अंक छ । १२ टोली सम्मिलित लिगमा अझै यो सिजन १० खेल बाँकी रहेको छ । फ्रान्सेली लिग महिला फुटबलमा विश्वकै उत्कृष्ट मध्यको एक मानिन्छ । ओलम्पिक लिओने र पेरिस सेन्ट जर्मेनमा विश्व स्तरीय फुटबलर खेल्छन् र च्याम्पियन्स लिगमा पनि दाबेदारी रहँदै आएको छ ।