अखबार नेपाल ट्रेन्डिङ

काठमाडौं: नेपालले आइसिसी यू-१९ प्रिमियर कपको उपाधिका लागि आज यूएईसँग प्रतिस्पर्धा गर्दैछ । नेपालले सेमिफाइनलमा जापानलाई डकवर्थ लेविस पद्धतिको आधारमा १४३ रन तथा युएईले दोस्रो सेमिफाइनल खेलमा सिंगापुरलाई डवकर्थ लेविस पद्धतिको आधारमा १० विकेटले हराउँदै फाइनलमा स्थान बनाएका हुन् ।

नेपालले गत फागनुमा आइसिसी यू-१९ विश्वकप एसिया क्षेत्र छनोटमा युएइृलाई ७ रनले हराउँदै २०२४ को विश्वकपमा स्थान बनाएको थियो । नेपाल पुन युएईलाई हराउदै उपाधि जित्न चाहन्छ । युएई त्यसको बदला लिन खोज्नेछ । दुबै टोलीमा विश्वकप एसिष क्षेत्र छनोट खेल्दाका खेलाडी छन् । नेपालले समूह चरणमा इरानलाई २७४, बहराइनलाई ७ विकेट र साउदी अरेवियालाई ३०२ रनले हराएको थियो । उता युएईले समूह चरणमा चीनलाई ९ विकेट, ओमानलाई ३ विकेट, कतारलाई १० विकेटले हराएको थियो ।

युएईले उपाधि जित्ने लक्ष्यका साथ सिनियर टोलीका तीन खेलाडीलाई टोलीमा समेटेको थियो । त्यसैको कारण त्रिकोणात्मक सिरिज आयन खानले खेलेका छैनन् । युएईको टोलीबाट खेलि सकेका आयन खानसँगै ओपनर अर्यांश शर्मा र मध्यक्रमका ब्याटर एथान डि सोल्झा युएईको यू-१९ टोलीमा छन् ।

कप्तान आयनले युएईको टोलीबाट २५ र १६ टि-२० आई खेल खेलेका छन् । उनी स्पिनसँगै तल्लोक्रममा राम्रो ब्याटिङ गर्ने गर्दछन् । ओपनर शर्माले ७ ओडिआई र ९ टि-२० आई खेल खेलेका छन् । गत अगष्टमा न्युजिल्यान्डविरुद्ध टि-२० आई डेब्यू खेलमै उनले ६० रन बनाएका थिए । डि सोल्झाले युएईबाट ३ ओडिआई खेल खेलिसकेका छन् । सोल्झाले विश्वकप छनोटमा नेपालविरुद्ध ५० रन बनाएको थियो । विश्वकप छनोटमा सर्वोत्कृष्ट चुनिएका ध्रुव परेसार पनि घातक बन्न सक्छन् ।

युएईलाई यू-१९ विश्वकपमा पुग्न जितको लागि १६ बलमा ८ रन चाहिँदा दीपेश कँडेलले लगातार तीन विकेट लिदै नेपाललाई विश्वकपमा पुर्याएका थिए । दीपेशले जारी प्रतियोगितामा ४ खेलमा १८ विकेट लिएका छन् । दीपेशले साउदी र बहराइनविरुद्ध ६–६ विकेट लिएका थिए । जापान र इरानविरुद्ध ३–३ विकेट लिएका थिए ।

नेपालको सिनियर टोलीबाट खेलेका देव खनालले बहराइनविरुद्ध १ सय रनको शतकीय इनिङ खेलेका थिए । अर्जुन कुमालले साउदी अरेवियाविरुद्ध १४२ रनको सानदार शतकीय इनिङ खेलेका थिए । यी तीन खेलाडी नेपालका प्रमुख हतियार हुन् । विशाल विक्रम केसीको प्रदर्शन मध्यक्रममा महत्वपूर्ण हुनेछ । स्पिनर सुवास भण्डारी र दीपेको प्रदर्शन निकै महत्वूर्ण हुने अनुमान गरिएको छ । नेपालको तीव्र गतिको बलिङ आक्रामण आकाश चन्द, दुर्गेश गुप्ता र हेमन्त धामीले सम्हाल्नेछन् । समूह चरण र सेमिफाइनलमा सहज जित हात पारेको नेपालको असली परिक्षा हुनेछ ।