अखबार नेपाल ट्रेन्डिङ

काठमाडौं: नेपाल, यूएई र हङकङ सम्मिलित त्रिकोणात्मक त्रिदेशीय टि-२० आई सिरिज अन्तर्गत नेपालले लगातार दोस्रो जित निकालेको छ । बिहिबार भएको खेलमा हङकङलाई ६ विकेटले हराउँदै नेपाल ४ अंकमा तालिकाको शीर्ष स्थानमा छ ।

हङकङले दिएको ९५ रनको लक्ष्य नेपालले १३.५ ओभरमा ४ विकेट गुमाउँदै भेट्टायो । नेपालका लागि ओपनर आशिफ शेखले सर्वाधिक ४२ रन बनाउँदा क्याच आउट भए । ३४ बलको सामना गरेका आशिफले ६ चौका हाने । कप्तान रोहित पौडेल २ छक्का र गुलसन झा १४ रनमा नटआउट रहे । २० बलको सामना गरेका रोहितले १ चौका र २ छक्का हाने। गुलसनले ५ बलमा २ छक्का प्रहार गरे ।

ओपनर कुशल भुर्तेल ८ रनमा बोल्ड आउट भए । सन्दिप जोरा ३ तथा कुशल मल्ल १ रनमा बोल्ड आउट भए । हङकङका इसान खानले ३ विकेट लिए। यासिम मुर्तजाको नाममा एक विकेट रह्यो ।

त्यसअघि मुलपानी क्रिकेट मैदानमा नेपालले टस जितेर फिल्डिङ रोजेपछि ब्याटिङ गरेको हङकङले निर्धारित १९.३ ओभरमा ९४ रनमा समेटिएको थियो । नेपालका करण केसी एक्लैले चार विकेट लिए । किफायती बलिङ गरेका करणले आफ्नो स्पेलमा मात्र १५ रन दिए ।

करण केसीले ओभरको पहिलो बलमा नै ओपनर तथा कप्तान निजाकात खानलाई बोल्ड आउट गरे । अर्का ओपनर अशुं रथलाई ७ रन बनाउँदा करणले आशिफ शेखको हातबाट क्याच आउट गराए । इजाज खानलाई ७ रनमा क्याच आउट गराएका करणले हरोन हर्सदलाई बोल्ड आउट गरे । अविनास बोहोरा र सोमपाल कामीले समान दुई विकेट आफ्नो नाममा गरे। कुशल मल्ल, मौसम ढकालले समान एक एक विकेट लिए ।

हङकङका लागि याशिम मुर्ताजाले सर्वाधिक ३६ रन बनाए। ३६ बलको सामना गरेका उनले २ चौका र १ छक्का हाने । जिसान अलीले १७ रन थपे। अन्य ब्याटरले दोहोरो अंकको स्कोर छुन सकेनन् । डबल राउण्ड रोविनमा हुने सिरिजको शीर्ष २ मा रहने टोलीले फाइनलमा भिड्नेछन् । नेपालले सिरिजको अर्को खेलमा शनिबार युएईसँग खेल्नेछ ।