अखबार नेपाल ट्रेन्डिङ

काठमाडौं: पूर्वराजा ज्ञानेन्द्र शाहले इजरायलमा १० जना नेपाली मारिएको घटनाप्रति गहिरो दुःख व्यक्त गरेका छन् । सोमबार विज्ञप्ति प्रकाशित गरी पूर्वराजाको संवाद सचिवालयले ‘अध्ययन र रोजगारीका शिलशिलामा त्यहाँ रहेका हजारौं नेपालीहरु युद्धको चपेटाबाट संकटापन्न अवस्थामा रहेकोमा’ गम्भीर चिन्ता जाहेर गरेको छ ।

सचिवालयले इजरायलमा रहेका नेपालीहरुलाई स्वदेश फर्काउनका लागि तत्काल पहल गर्न पनि सरकारसँग आग्रह गरेको छ ।

विज्ञप्तिमा भनिएको छ :

हालै इजराईलमा भड्किएको दुई पक्षीय युद्धमा परि १० जना नेपाली विद्यार्थीहरुको मृत्यु भएको र अरु कयौं घाइते भएकोमा हामीलाई गहिरो दुःख लागेको छ । अध्ययन र रोजगारीका शिलशिलामा त्यहाँ रहेका हजारौं नेपालीहरु युद्धको चपेटाबाट संकटापन्न अवस्थामा रहेकोमा हामीलाई गम्भीर चिन्ता लागेको छ ।

यस्तो वियोग, वेदना र संकटको अवस्थामा उद्धार, उपचार गर्न र सबै नेपालीहरुलाई स्वदेश फर्काउनको लागि नेपालले तत्काल पहल गर्नु पर्ने तथा शान्त कूटनीतिक क्षमता दर्शाइ हाल्नु पर्ने आवश्यकता रहेको हामीले महशुस गरेका छौं । आजको दुनियाँमा कहिं पनि द्वन्द्व र युद्धले राम्रो गर्दैन भन्ने मान्यता राख्दै आपसी सम्बन्ध सुधारका लागि सबै पक्षबाट सकारात्मक प्रयास हुनु पर्ने हाम्रो धारणा रहेको छ ।

मिति २०८० साल असोज २२ गते

सम्बाद सचिवालय