अखबार नेपाल ट्रेन्डिङ

काठमाडौं: १९औं एसियाली खेलकुद (एसियाड) अन्तर्गत नेपालको पिस एलिट एसिया गेम्स (पब्जी) को सेमिफाइनलमा प्रवेश गरेको छ ।

क्वाटरफाइनलको समूह ‘सी’ मा नेपाल शीर्ष दुई स्थानमा रहँदै सेमिफाइनल चरणमा स्थान बनाउन सफल भएको हो । नेपाल रहेको समूहबाट हङकङ समूह विजेता बन्दै अघि बढेको हो । वरीयताका आधारमा सिधै क्वाटरफाइनलमा स्थान बनाएको प्यालेस्टाइनबाट त्यसपछि चुनौति अपेक्षा गरेपनि नेपालले लगातार समय अन्तर बढाएको थियो ।

यस समूहबाट तेस्रो र चौथो भएका प्यालेस्टाइन र साउदी अरब भने बाहिरिएका छन् । अब नेपालले शनिबार हुने सेमिफाइनलमा अन्य चार टोलीसँग समूहमा प्रतिस्पर्धा गर्नेछ । सेमिफाइनलमा दुवै समूह खेल शनिबार हुनेछ । यद्यपि समूह विभाजन भने भइसकेको छैन । सेमिफाइनलमा शीर्ष दुई हासिल गरे नेपाल फाइनल पुग्दै पदकको सम्भावना हुनेछ ।

नेपालले एकपछि अर्को खेलमा पराजय भोग्दै गर्दा पदकको आशा गरिएको पब्जीले भने लगातार दोस्रो पटक अर्को चरणको यात्रा तय गरेको छ । नेपालबाट कप्तान सुविन महर्जन, दीपेश गुरुङ, सागर भण्डारी, समीर गुरुङ र संगिन भट्टराई खेलाडी रहेका छन् । भिक्टर पौडेल टोलीमा व्यवस्थापक रहेका छन् ।