अखबार नेपाल ट्रेन्डिङ

काठमाडौं: नेपाल अर्बुद रोग निवारण संस्थाले ४१औं वार्षिकोत्सव मनाएको छ । राजधानीमा एक कार्यक्रमको आयोजना गरी संस्थाले क्यान्सर विरुद्धको अभियानमा योगदान पुर्याएका दर्जनौ संघसंस्थाहरुलाई पुरस्कृत गरी आफ्नो वार्षिकोत्सव मनाएको हो ।

कार्यक्रममा सांसद तेजुलाल चौधरीले सुर्तीजन्य पदार्थमा लगाइने कर वृद्धी नगरिएको प्रति असन्तुष्टी प्रकट गर्दै सरकार क्यान्सर रोग निवारणमा गम्भीर नभएको जिकिर गरे । सांसद चौधरीले सरकार नै सक्रिय नभएसम्म क्यान्सर रोग रोकथाम र उपचारमा गैर सरकारी संस्थाहरुको प्रयास पर्याप्त हुन नसक्ने तर्फप्रति ध्यानकर्षण गराए । उनले नेपाल अर्वुद रोग निवारण संस्थाले गरेको कामहरुको प्रशंसा गर्नुका साथै आगामी दिनमा पनि प्रभावकारी कार्यक्रम गरे सहयोग गर्ने प्रतिवद्धता व्यक्त गरे ।

कार्यक्रममा संस्थाका अध्यक्ष महेश श्रेष्ठले क्यान्सर रोगका कारण विकसित राष्ट्रहरुको तुलनामा विकासोन्मुख र अविकसित राष्ट्र्रहरुमा मृत्युदर विकराल रहेको बताउँदै यसको रोकथामका लागि अब ढिला गर्न नहुने बताए । भक्तपुर क्यान्सर अस्पताको स्थापना र सफल सञ्चालन गरिसकेको प्रसंग उल्लेख गर्दै अध्यक्ष श्रेष्ठले निकट भविष्यमा अन्तराष्ट्रिय स्तरको क्यान्सर डायग्नोष्टिक सेण्टर स्थापना गर्न लागेको बताए ।

अध्यक्ष श्रेष्ठले यो संस्थाले देशमा विकराल रुपमा विस्तार भईरहेको क्यान्सर रोगको रोकथामका लागि सचेतनामूलक कार्यक्रमहरुका साथै क्यान्सर रोगीहरुको उपचारात्मक कार्यका लागि सहयोग पुर्याईरहेको दावी गरे । उनले राष्ट्रियस्तरको गैर नाफामूलक सामाजिक संस्थाका रुपमा स्थापित यस नेपाल अर्बुद रोग निवारण संस्थाले सातै प्रदेश सरकार र स्थानीय स्वास्थ्य सेवा प्रदायकहरु र पालिकाहरुको समन्वयमा जनचेतना जागरण र क्यान्सर रोगीको उपचार दुवैमा सहयोग पुर्याउँदै आएको जानकारी दिए ।

नेपाल अयुर्वेद रोग निवारण संस्थाका महासचिव दिपेन्द्र बान्तवाले क्यान्सर सम्वन्धी काम गर्ने जेठो संस्था भएकाले अबका दिनमा क्यान्सर विरुद्धका अभियानमा लागेका सबै संघसंस्थाहरुसँग सहकार्य गरी अघि बढ्ने बताए । महासचिव वान्तवाले संस्थाको प्रतिवेदन प्रस्तुत गर्दै क्यान्सर जस्तो प्राणघातक रोग विरुद्ध लड्न सबै एकजुट भएमात्र सम्भव भएको बताए ।

कार्यक्रममा क्यान्सर सर्भाइबर गायिका देविका बन्दना, नेपाल विकास अनुसन्धान प्रतिष्ठानका अध्यक्ष नवराज खतिवडा, भरतपुर क्यान्सर अस्पतालका पुर्व अध्यक्ष प्रकाशराज न्यौपाने लगायतले क्यान्सर रोग नियन्त्रण र उपचारका लागि लिनुपर्ने कदमका बारेमा प्रकाश पारेका थिए ।

संस्थाको वार्षिकोत्सवको अवसरमा एक दिन अघि मात्रै क्यान्सर रोग विरुद्ध सचेतना र क्यान्सर डायग्नोष्टिक सेण्टर स्थापनार्थ कोष संकलनका लागि बृहत पदयात्राको आयोजना गरिएको थियो । कार्यक्रममा सेरो ल्याव, यतिकेम, प्रसिडेण्ट टुर्स एण्ड ट्राभल, शुभगुरु सुनचादी पसल, इभेण्ट सोलुसन लगायतका विभिन्न संघसंस्थाहरुलाई प्रमाणपत्र सहित सम्मान र पुरस्कृत गरिएको थियो ।