अखबार नेपाल ट्रेन्डिङ

काठमाडौं: भुटानको पारो एफसीलाई ३-२ गोल अन्तरले हराउँदै मछिन्द्र फुटबल क्लब एएफसी कप छनोट अन्तर्गत प्लेअफको दोस्रो चरणमा प्रवेश गरेको छ ।

मछिन्द्रको जितका लागि विमल घर्ती मगर, आयुष घलान र ओलावाले आफिजले १-१ गोल गरे । यसअघिको संस्करणमा श्रीलंकाको ब्लु स्टारसँग मछिन्द्र पराजित भएको थियो ।

मछिन्द्रले अब प्लेअफको दोस्रो चरणमा भारतीय क्लब मोहन बगान सुपर जायन्टको सामना गर्नेछ । खेल साउन ३१ गते बुधबार कोलकातास्थित साल्ट लेक रंगशालामा हुनेछ ।

यो खेलको विजेताले समूह चरणमा स्थान बनाउन बंगलादेशको अवाहानी ढाका र माल्दिभ्सको क्लब इगल्सको विजेतासँग खेल्नेछ ।

दशरथ रंगशालामा खेलको छैटौं मिनेटमा पारोले अग्रता लिएको थियो । जापानी फरवार्डको प्रहार गोलरक्षक विशाल श्रेष्ठले बचाउने प्रयास गरेपनि उनको हातमा लाग्दै पोस्टभित्र छिर्यो । तर मछिन्द्रले खेलको पाँच मिनेट नबित्दै बराबरी गोल फर्कायो ।

१२ अ‍ौं मिनेटमा सर्ट कर्नरपछि आयुषको क्रमलाई विमलले हेडरमार्फत गोलमा परिणत गरे ।लगत्तै १५ अ‍ौं मिनेटमा विमल र आयुषको सहकार्यमा मछिन्द्रले अग्रता लियो । विमलले पेनाल्टी क्षेत्र भित्रबाट मिलाएको पासमा आयुषले पहिलो टचमा सुन्दर गोल गरे ।

खेलको ३९औं मिनेटमा मछिन्द्रका लागि ओलावाले आफिजले गोल गरे । मिडफिल्डमा ओमोलाजा करीमले अन्तिममा दायाँ विंगबाट दिएको सुन्दर क्रसमा आफिजले हेडरमा गोल गरे ।

खेलको ५८औं मिनेटमा गोलरक्षक विशालले यसी दोर्जीको प्रहार बचाउँदै मछिन्द्रको २ गोलको अग्रता कायम राखे । खेलको ७१औं मिनेटमा एभान्स असान्तेले गोल गर्दै पारोलाई खेलमा फर्काउने संकेत दिए ।

निकै कडा प्रतिष्पर्धा रहेको खेलको ९०औं मिनेटमा कप्तान विशालले काजुओको प्रहारलाई आफ्नो दायाँतर्फ डाइभ दिँदै विफल पारे । इन्ज्युरी समयमा विमलले खाली पोस्टमा बललाई पोस्टको दिशा दिन नसक्दा खेल ३-२ मा टुंगिएको थियो ।