अखबार नेपाल ट्रेन्डिङ

काठमाडौं: साफ च्याम्पियनसिप २०२३ मा नेपालले अन्तिम खेलमा पाकिस्तानलाई १-० गोल अन्तरले पराजित गर्दै सान्तवना जितसहित प्रतियोगिताको सुखद अन्त्य गरेको छ ।

नेपालका लागि आशिष चौधरीले खेलको अन्त्यतिर गोल गर्दै नेपाललाई जित दिलाएका थिए । नेपाल पहिलो खेलमा कुवेतसँग ३-१ र भारतसँग २-० ले पराजित भएको थियो । पाकिस्तानले भने दुवै खेलमा ४-० को हार व्यहोरेको थियो ।

पहिलो हाफको अन्त्यमा विमल घर्तीमगरले पेनाल्टी क्षेत्रभित्रबाट गरेको प्रहार सिधै गोलरक्षकको हातमा गएको थियो । खेलको ६१ औं मिनेटमा मनिष डाँगीको प्रहारलाई पाकिस्तानी गोलरक्षकले विफल पारे ।

खेलको ८०औं मिनेटमा आशिष चौधरीले नेपाललाई अग्रता दिलाए । लाकेन लिम्बुले पेनाल्टी क्षेत्र बाहिरबाट मिलाइदिएको पासलाई आशिषले गोलमा परिणत गरे ।

इन्ज्युरी समयको पहिलो मिनेटमा नेपाल अग्रता दोब्बर पार्नबाट चुक्यो । लाकेन लिम्बु र नवयुग श्रेष्ठको ६ यार्ड बक्स भित्रबाट लगातारको प्रहार गोल हुन सकेन ।

यस समूहबाट भारत र कुवेत सेमिफाइनलमा प्रवेश गरिसकेका छन् । यी दुईबीच समूह विजेता बन्न आज साँझ ७:४५ बजे प्रतिस्पर्धा हुनेछ ।