अखबार नेपाल ट्रेन्डिङ

काठमाडौं: विभागीय भागवण्ड सकेपछि शनिबार स्थगित भएको सत्तारुढ नेपाल कम्युनिस्ट पार्टी नेकपाको सचिवालय बैठक आज बस्ने भएको छ ।

जनवर्गीय र भातृसंगठनहरूको भागवण्डा नटुंगिएपछि हिजोका लागि बोलाइएको बैठक आवश्यक तयारी नपुगेको भन्दै स्थगित गरिएको थियो । एकताको अन्तिम काम टुंग्याउन हिजो ४ बजेका लागि सचिवालय बैठक डाकिएको थियो । तर तयारी नपुगेको भन्दै बैठक आजका लागि सारिएको थियो । आज बस्ने बैठकमा जनवर्गीय संगठनको इन्चार्ज तोक्ने तयारी रहेको स्रोतले जनाएको छ ।

बैठकमा प्रदेश कमिटीस्तरीय विशेष कमिटी गठनको एजेण्डा रहेको स्रोतले जनाएको छ । नेकपाले एकताका क्रममा हालसम्म जिम्मेवारी पाउन नसकेका केन्द्रीय सदस्यलाई जनसंगठन इञ्चार्ज र सहइञ्चार्ज बनाउने तयारी गरेको छ । आज वरिष्ठ नेताहरू माधवकुमार नेपाल र झलनाथ खनालको वरीयताबारे पनि कुरा हुने जनाइएको छ ।

शुक्रबारको बैठकमा नेता खनालले आफूले तीन नम्बरको वरीयता पाउनुपर्ने भनेपछि नयाँ विवाद सुरू भएको थियो । अहिले अध्यक्षद्वयपछि माधव नेपालको वरीयता रहेको छ । पार्टी एकताका क्रममा आफू चीन गएका बेला पार्टी बैठकबाट वरीयता घटाएको भन्दै खनालले आपत्ति जनाएका थिए । नेकपाले ३२ वटा विभाग र नीति अध्ययन प्रतिष्ठानको प्रमुख उपप्रमुखमा चयन गरिसकेको छ ।