अखबार नेपाल ट्रेन्डिङ

काठमाडौं: आगामी फेब्रुअरी १२ देखि १५ सम्म दुबईमा हुन लागेको नेपाल चलचित्र विकास बोर्डले सूर्य कर्पोरेसनसँग मिलेर गर्न लागेको ‘नेपाल्स् सिनेमा फेस्ट २०२३’ विवादमा परेको छ ।

सोमबार प्रेस विज्ञप्ति जारी गरेर फेस्टमा आफ्नो फिल्म नदेखाउन भनेको महापुरुष टिमले फेस्टप्रति प्रश्नसमेत उठाएको छ । बोर्डको नेतृत्व सम्हाल्न पुगेसँगै विवादमा तानिएका भुवन केसी सूर्य कर्पोरेसनसँग गरेको यो सहकार्यले अर्को विवादमा तानिएका छन् ।

विवादित कम्पनीलाई फेस्टिभल गर्ने जिम्मा दिएको सार्वजनिक भएपछि मिडियादेखि फिल्म क्षेत्रका जिम्मेवार मानिसहरुले निरन्तर प्रश्न उठाइरहेका छन् ।

सूर्य कर्पोरेसन र भुवनबीच व्यावसायीक सम्बन्ध पहिलाबाटै रहेको भन्दै टिप्पणी भइरहको छ । दुबईको स्टार सिनेमा (अल घुरैर सेन्टर) मा हुने फेस्टिभलमा नेपाली फिल्महरू ‘कबड्डी ४’, ‘ऐना झ्यालको पुतली’, ‘महापुरुष’ फिल्म प्रदर्शन गर्ने भनेर प्रचार भइरहेका बेला महापुरुष टिमले आफ्नो फिल्म नदेखाउन भनिसकेको छ ।

बाबु आयोजक भएको कार्यक्रममा छोरा अनमोल केसी अतिथिका रुपमा जाने भएका छन् । योसँगै भुवनको झन् धेरै विरोध सुरु भएको छ । फिल्म उद्योगमा लामो समयदेखि बहसको विषय बनिरहेको नातावाद र कृपावादलाई भुवनले आफैँ आयोजक भएको अवार्डमा छोरालाई अतिथिका रूपमा राखेर त्यही कुरालाई प्रमाणित गरेको भन्दै केसीको विरोध भइरहेको छ ।