अखबार नेपाल ट्रेन्डिङ

रामेछाप: रामेछाप जिल्लाका विभिन्न स्थानहरुमा विगत २ दिनदेखि श्रृखलाबद्ध रुपमा चोरीहरु भएका छन् ।

जिल्लाको गोकुलगंगा गाउँपालिका र मन्थली नगरपालिकामा बिहिबार र शुक्रबार गरी दुई दिनमा विभिन्न १३ स्थानमा चोरीका घट्नाहरु  भएका हुन् ।

जिल्ला प्रहरी कार्यालय रामेछापका अनुसार मन्थली नगरपालिकाका ८ र गोकुलगंगा गाउँपालिकाका ५ स्थानमा गरी १३ स्थानमा चोरी भएका हुन् ।

सडक आसपासका पसल, सहकारी संस्था तथा व्यक्तिका घरहरुमा चोरी भएको जिल्ला प्रहरी कार्यालय रामेछापका प्रहरी प्रमुख राजकुमार थिङ्गले बताए ।

चोरीका घट्नाको प्रकृति हेर्दा व्यबसायीक चोरहरुको संलग्नता भएको अनुमान गरिएको प्रहरीले जनाएको छ ।

चोरहरुले पन्जा तथा मास्क प्रयोग गरेकाले पत्ता लगाउन कठिन भइरहेको प्रहरी प्रमुख थिङ्गले बताए । उनले चोरहरुको खोजीकार्यलाई तिव्रता दिएको जानकारी दिए ।

गोकुलगंगा गाउँपालिकामा बिहिबार राति २ वटा पसल, २ वटा व्यक्तिका घर र १ वटा सहकारी संस्थामा चोरी भएको थियो ।

यसैगरी शुक्रबार राति मन्थली नगरपालिकामा ८ स्थानमा चोरी भएको प्रहरीले जनाएको छ । चोरीका दुवै घट्नामा एउटै समुहको संलग्नता रहेको प्रहरीको अनुमान छ ।

जिल्लामा यसरी श्रृखलाबद्ध रुपमा एकै पटक यति धेरै स्थानमा चोरीको घट्ना भएको यो पहिलो पटक हो । चोरीको घट्नासंगै सर्वसाधारणहरुमा त्रास बढेको छ ।

गाउँमा चोरीको घट्ना भएपछि आफुहरु आतंकित भएको गोकुलगंगा गाउँपालिका-४ बेतालीका सिताराम कार्कीले बताए ।

यसैगरी गाउँमा एकै रात ८ स्थानमा चोरी भएकाले आफुहरुमा त्रास श्रृजना भएको सालुका रुपक मगरले बताए ।

चोरीको घट्नापछि उक्त क्षेत्र सहित जिल्लाका अन्य स्थानमा पनि सुरक्षा सर्तकता बढाइएको रामेछापका प्रमुख जिल्ला अधिकारी दिपक पहाडिले बताए ।