अखबार नेपाल ट्रेन्डिङ

काठमाडौं:  उच्चस्तरीय कोभिड संकट व्यवस्थापन केन्द्र(सीसीएमसी)ले सरकारका मन्त्रालय, विभाग र कार्यालयका लागि सवारी पासको कोटा निर्धारण गरेको छ । सरकारले सरकारी र सार्वजनिक सेवा दिने कार्यालयका कारण सडकमा भीडभाड बढेपछि आइतबारदेखि कडाई गर्ने भएको हो ।

सीसीएमसीले आइतबारदेखि संघीय सरकारका मन्त्रालयले १० वटा सवारी मात्र चलाउन पाउने निर्णय गरेको छ । यस्तै, विभागले ५ वटा र अन्य सरकारी कार्यालयले सचिव र सहसचिवबाहेक अधिकतम ३ वटा मात्रै सवारी संचालन गर्न पाउनेछन् ।

यो नियम बैंक तथा वित्तीय संस्थाको हकमा समेत लागू हुने  र यसका लागि नेपाल राष्ट्र बैंकले सहजीकरण गर्नेछ । केन्द्रीय बैंकले आइतबार बैंक तथा वित्तीय संस्थाले चलाउन पाउने सवारी संख्या र कर्मचारी संख्याको विषयमा आवश्यक निर्देशन जारी गर्नेछ ।

सीसीएमसीका एक सदस्य मन्त्रीका अनुसार शुक्रबारको बैठकले आइतबारदेखि थप कडाई गर्ने नीतिअनुसार सरकारी तथा सार्वजनिक सेवा प्रवाह गर्ने कार्यालयका लागि सवारी पासको अधिकतम कोटा तोकेको हो ।

यो पनि पढ्नुहोस्:

कोरोना महामारीको दोस्रो लहर तीव्र रूपमा बढेपछि विभिन्न जिल्लामा निषेधाज्ञा जारी