अखबार नेपाल ट्रेन्डिङ

काठमाडौं:  नेपाल राष्ट्र बैंकले आफ्ना कर्मचारीलाई कल्याणकारी सञ्चय कोष मार्फत करीव ५५ करोड रुपैयाँ भुक्तानी दिएको खुलेको छ ।

नेपाल सरकारले बजेटमार्फत कोरोना महामारीको कारण देखाउँदै खर्च कटौतीका लागि निजामती कर्मचारीको तलब भत्ता बृद्धि गरेको थिएन । तर,  नेपाल राष्ट्र बैंकका कर्मचारीले सोही अवधिको कर्मचारी कल्याणकोष मार्फत दामासाहीले अतिरिक्त रकम बुझेका छन् ।

नेपाल राष्ट्र बैंकमा कनिष्ठदेखि बरिष्ठसम्मका कर्मचारीलाई उनीहरुको ग्रेडका आधारमा रकम बितरण गरिएको स्रोतले जानकारी दिएको छ । राष्ट्र बैंकमा १२९० जनाको स्थायी दरबन्दी रहेको छ ।

नेपाल राष्ट्र बैंकले आर्थिक बर्ष २०७६/७७ को बार्षिक प्रतिवेदन ३ महिना ढिलो गरी प्रकाशन गर्दै कर्मचारी कल्याणकारी कोष मार्फत कर्मचारीलाई रकम भुक्तानी दिइएको हो ।

नेपाल राष्ट्र बैंकको कर्मचारी कल्याणकारी सञ्चयकोषका लागि मुनाफाको १० प्रतिशतसम्मको रकम जम्मा गर्न सकिने व्यवस्था भएपनि उक्त रकम बितरण गर्न भने नपाइने जानकारहरु बताउँछन् ।

नेपाल राष्ट्र बैंकको कर्मचारी विनियमावलीको तेस्रो संसोधन २०७४ को विनियम ७८ भएको ब्यवस्थानुसार बैंकको खुद नाफालाई आधार बनाई कर्मचारी कल्याणकारी सञ्चयकोषमा छुट्याइएको रकम १० प्रतिशतले बृद्धि गरी हुन आउने रकम कोषमा जम्मा गर्नुपर्ने ब्यवस्था रहेको छ ।

कर्मचारी कल्याणकारी सञ्चय कोषमा जम्मा भएको रकम अवकास कोषमा जम्मा गर्नुपर्ने र अबकास कोषको सिमा भन्दा बढी कर्मचारीलाई मात्रै रकम बितरण गर्न पाइने व्यवस्था उक्त विनियमावलीमा उल्लेख गरिएको छ । त्यसका लागि नेपाल राष्ट्र बैंकको सञ्चालक समितिले अनुमति प्रदान गर्नुपर्ने कानूनी व्यवस्था रहेको छ ।

नेपाल राष्ट्र बैंक, बैंक तथा वित्तीय संस्थाको नियामक निकाय भएकाले आफ्ना कर्मचारीहरुलाई बोनस बितरण गर्न पाउने कानुनी व्यवस्था नभएकाले कर्मचारी कल्याणकारी सञ्चय कोष मार्फत राष्ट्र बैंकको मुनाफाबाट १० प्रतिशत हुन सम्म रकम बितरण गर्दै आएको नेपाल राष्ट्र बैंक श्रोतले जनाएको छ ।

हाल नेपाल राष्ट्र बैंकको सञ्चालक समितिको अध्यक्षमा गर्भनर महाप्रसाद अधिकारी , सदस्यहरुमा अर्थमन्त्रालयका सचिव शिशिर ढुङ्गाना, नेपाल राष्ट्र बैंकका डेपुटी गर्भनरद्धय निलम ढुङ्गाना तिम्सिना र बमबहादुर मिश्र त्यस्तै डा.श्रीराम पौडेल , रामजी रेग्मी र सुवोध कुमार कर्ण रहेका छन् ।

यो पनि पढ्नुहोस् :

नेपाल स्टक एक्सचेञ्जमा ३५.८९ अंकको गिरावट