अखबार नेपाल ट्रेन्डिङ

काठमाडौं: साविक नेकपा प्रचण्ड–नेपाल समूहको स्थायी कमिटी बैठकले पूर्व एमाले र पूर्व माओवादी केन्द्र अलग-अलग भएर जाने निर्णय गरेको छ ।

पेरिसडाँडामा बसेको बैठकबारे जानकारी गराउँदै वरिष्ठ नेता झलनाथ खनालले आ-आफ्नो पार्टीबाट रहेर एकताका लागि पहल गर्ने निष्कर्ष निकालेको बताए ।

यसैगरी प्रवक्ता नारायणकाजी श्रेष्ठले माओवादी र एमाले अलग भएर जाने निर्णय भएको बताए ।

उनले भने, नयाँ ढंगको एकीकरणको पहल भयो भने त्यही ढंगको भयो । माओवादी र नेकपा एमालेको प्रक्रिया अघि बढ्नेछ । यद्यपी निर्वाचन आयोगले पत्र लेखेपछि आयोगमा गएर नै प्रक्रिया प्रारम्भ हुन्छ ।’

बैठकले २०७५ जेठ ३ गते भएको एकीकरणपछि निर्माण भएको नेकपाको उद्धेश्यका बारेमा गम्भिरतापूर्वक अघि बढ्ने संकल्प गरेको प्रवक्ता श्रेष्ठको भनाइ छ ।

बैठकमा अध्यक्षद्वय पुष्पकमल दाहाल प्रचण्ड, माधवकुमार नेपाल, वरिष्ठ नेता झलनाथ खनाललगायत नेताहरु सहभागी थिए ।

नेकपा नाम सम्बन्धी विवादमा आइतबार सर्वोच्च अदालतले फैसला सुनाउँदै ऋषी कट्टेललाई नाम दिएपछि एमाले र माओवादी केन्द्र ब्युँतिएको हो ।