अखबार नेपाल ट्रेन्डिङ

काठमाडौं: राष्ट्रिय महिला लिग फुटबलमा स्याङ्गजाको वालिङ नगरपालिकाले चन्द्रपुर नगरपालिकालाई पराजित गरेको छ ।

सातदोबाटोस्थित एन्फा कम्प्लेक्समा आज भएको खेलमा वालिङले चन्द्रपुरलाई ३-० गोल अन्तरले पराजित गरेको हो ।

वालिङको जितमा मेथो रुथले दुई गोल गरिन् । यस्तै टोउटा ओर्नेलाले एक गोल थपिन् ।

खेलको ३७ औं मिनेटमा क्यामरुनी खेलाडी ओर्नेलाले फ्रिकिकबाट गोल गर्दै वालिङलाई अग्रता दिलाएकी थिइन् ।

खेलको ४५ औं मिनेटमा क्यामरुनकै रुथले गोल गर्दा वालिङ २-० ले अघि रह्यो ।

त्यसपछि खेलको ५४ औं मिनेटमा रुथले व्यक्तिगत दोस्रो गोल गर्दै वालिङलाई ३-० को सहज जित दिलाईन् ।

वालिङको यो लिगमा दोस्रो जित हो । जितसँगै वालिङले ६ खेलमा ८ अंक जोडेको छ ।

वालिङ तेस्रो स्थानमा उक्लिएको छ । चन्द्रपुरले ६ खेलमा ३ अंक जोडेको छ ।