अखबार नेपाल ट्रेन्डिङ

काठमाडौं: भक्तपुर चाँगुनारायण नगरपालिका-८, सुडालका चन्द्र बहादुर योञ्जन (लामा)को हत्याका मुख्य योजनाकारलाई प्रहरीले पक्राउ गरेको छ ।

घटनाका मुख्य योजनाकार मध्येका सिन्धुपाल्चोक जिल्ला बाह्रविसे न.पा.-२ टिमुरे घर भएका माईला भन्ने सोनाम तामाङलाई यस महानगरीय अपराध महाशाखाबाट खटिएको टोलीले जिल्ला काभ्रे धुलिखेलबाट पक्राउ गरेको हो ।

गएको असोज ६ गते पसलमा आएका दुई जना अपरिचित व्यक्तिहरुले वियर समेत सेवन गरी आफन्तलाई जग्गा चाहिएको छ भन्ने बहाना बनाई मृतक लामा योञ्जनलाई जग्गा हेर्न भनी पसल भन्दा १ किलोमिटर पर विडोलफाँटस्थित धानखेतमा लगी कुटपिट गरी निजको साथमा रहेको सुनको ब्रासलेट तथा मोवाईल समेत लुटी कर्तव्य गरी फरार रहेको रहेका थिए ।

मृतकको उपचारको क्रममा ग्रीनसिटी अस्पताल बसुन्धरामा मृत्यू भएको थियो । घटनामा संलग्न व्यक्तिहरूको निरन्तर अनुसन्धान तथा खोजतलास पश्चात घटनाका मुख्य योजनाकार माईला भन्ने सोनाम तामाङलाई पक्राउ गरी आवश्यक कार्वाहीको लागी महानगरीय प्रहरी वृत्त जगाती पठाईएको छ ।

उक्त घटना पश्चात अनुसन्धान गर्ने क्रममा महानगरीय अपराध महाशाखाले “अपरेसन रक्स” संचालन गरी घटनामा संलग्न भएका व्यक्तिहरु मध्ये कामी लामा, रमेश तामाङ र प्रेम तामाङलाई यस अघि नै महानगरीय अपराध महाशाखाबाट खटिएको प्रहरी टोलीले काठमाडौंका विभिन्न स्थानबाट पक्राउ गरी आवश्यक कारवाहीको लागी महानगरीय प्रहरी वृत जगातीले भक्तपुर जिल्ला अदालतको आदेशले पुर्पक्षको लागि थुनुवामा राखेको छ ।