अखबार नेपाल ट्रेन्डिङ

बाँके: गण्डक प्रदेशनमा भेट्ने बाचा गर्दै आठौं वृहत राष्ट्रिय खेलकुद प्रतियोगिताको औपचारिक समापन भएको छ । बुधबार बाँकेको नेपालगञ्ज रंगशालामा एक समारोहकाबीच कार्यबहाक राष्ट्रपति नन्दबहादुर पुनले आठौं राष्ट्रिय खेलकुदको समापन गरेका थिए ।

समारोहमा मन्तव्य राख्दै कार्यबहाक राष्ट्रपति पुनले नवौं राष्ट्रिय खेलकुदको तयारीमा आजैबाट लाग्न सुझाएका थिए । उनले पुर्वाधारको निर्माण पुरा नहुँदै हुने राष्ट्रिय खेलकुद बारे आफु जानकार रहेको भन्दै पुर्वाधारको विकास बिना खेलाकुद अघि बढ्न नसक्ने बताए ।

कार्यक्रममा स्वागत मन्तव्य राख्दै सदस्य सचिव केशवकुमार विष्टले आठौं राष्ट्रिय खेलकुदको समापनसंगै नेपाली खेलकुदले ईतिहास रचेको बताए । उनले अठोट र दृढ संकल्प भएका कुनैपनि कठिन काम सम्पन्न गर्न सक्ने उदाहरण आठौं राष्ट्रिय खेलकुद बनेको दोहोर्याए ।

समापन मन्तव्य राख्दै राखेप उपाध्यक्ष पिताम्बर तिम्सिनाले विविध समस्याका बाबजुद आठौं राष्ट्रिय खेलकुद सम्पन्न गरेको बताए । राष्ट्रिय खेलकुदलाई सरकारले सागको तयारीको रुपमा समेत लिएको बताउँदै उनले आफुहरुको ध्यान अब सागको तयारीमा केन्द्रित हुने बताए । उनले राष्ट्रिय खेलकुदमा देखिएको कमजोरी गण्डकी प्रदेशमा नदोहरिने बताए ।

प्रदेश ५ का खेलकुद विकास समितिका अध्यक्ष भीम ओलीले प्रदेश नम्बर ५ ले आठौं आयोजना गरेर नेपाली खेलकुदमा ईतिहास रचेको बताए । प्रतियोगिताको बैशाख ५ गते राष्ट्रपति विद्यादेवी भण्डारीले औपचारिक उद्घाटन गरेकी थिईन् । प्रतियोगिताका खेलहरु २०७५ साल चैत २७ गते नै सुरु भएका थिए ।

प्रतियोगितामा सुरुवातदेखि नै बर्चश्व कायम गरेको विभागीय टोलीले समापनसम्म आइपुग्दा समेत आफूलार्इ अब्बल सावित गरेको छ । प्रतियोगितामा त्रिभुवन आर्मीले १ सय ४० स्वर्ण, ८१ रजत, ६७ कास्यसहित पहिलो स्थान ओगटेको छ । दोस्रो स्थानमा पनि विभागीय टिम पुलिस पर्न सफल भएको छ । पुलिसले ६२ स्वर्ण, ४९ रजत, ४६ कास्य जितेको छ ।

तेस्रोमा अर्को विभागीय टिम ससस्त्र प्रहरीको एपीएफले ५३ स्वर्ण, ६९ रजत, ८० कास्य हात पारेको छ । यस्तै प्रदेश-३ ले २२ स्वर्ण, गण्डकी प्रदेशले १२, प्रदेश-५ ले ११, प्रदेश-१ ले ९ स्वर्ण, सुदूरपश्चिम प्रदेशले ८ स्वर्ण जित्यो । प्रतियोगितामा पहिलो पटक सहभागिता जनाएको एनआरएन र प्रदेश-२ ले समान ६-६ स्वर्ण जित्दा, कर्णाली प्रदेशले ३ स्वर्ण जितेको छ । प्रतियोगितामा ३ सय ३२ स्वर्ण, ३ सय ३१ रजत र ४ सय ८० कास्य गरी कुल १ हजार १ सय ४३ पदकका लागि प्रतिस्पर्धा भएको थियो ।

समापन समारोहमा राखेपका सदस्य सचिव केशवकुमार विष्टले गण्डकी प्रदेशका खेलकुद विकास समिति अध्यक्ष सम्पन्न श्रेष्ठलाई नवौं राष्ट्रिय खेलकुद प्रतियोगिता आयोजनाको झण्डा हस्तान्तरण गरेका थिए । नवौं राष्ट्रिय खेलकुद प्रतियोगिता २०७७ साल फागुन २० देखि २७ सम्म सञ्चालन गर्ने राखेपको निर्णय छ ।

२०७३ सालमा सातौं राष्ट्रिय खेलकुद प्रतियोगिताको दौरान आठौंको झण्डा मध्यपश्चिमलाई हस्तान्तरण गरिएको थियो । सोही समय नवौं राष्ट्रिय खेलकुद तत्कालिन पश्चिमाञ्चललाई दिने सहमती गरिएको थियो । सोही सहमतीमा टेकेर राखेपको बोर्ड बैठकले नवौं संस्करण गण्डक प्रदेशमा गर्ने निर्णय गरेको हो ।

प्रत्येक दुई बर्षमा आयोजना गर्ने लक्ष्यका साथ २०३८ सालबाट सुरु भएको राष्ट्रिय खेलकुद सुरुका तीन संस्करणपछि नियमित हुन सकेको थिएन । प्रजातन्त्र पुर्नस्थापनापछि अनियमित बनेको राष्ट्रिय खेलकुकद २०७५ सालमा आएर क्रमभंग बनेको छ । ७३ सालमा सातौं राष्ट्रिय खेलकुद सम्पन्न गरेको राखेपले लगत्तै दुई बर्षमा वृहत राष्ट्रिय खेलकुदको अर्को संस्करण आयोजना गरेर ईतिहास रचेको छ ।