अखबार नेपाल ट्रेन्डिङ

काठमाडौंः राष्ट्रसंघीय नियोगले गाँजालाई औषधिजन्य वनस्पतिका रुपमा राखेको छ । नियोगले खतरनाक लागुपदार्थको सूचीबाट हटाउने प्रस्ताव पारित गर्दै औषधिजन्य वनस्पतिको रुपमा रुपमा राखेको हो ।

अन्तर्राष्ट्रिय समाचार संस्था सिएनएनका अनुसार लागुऔषध सम्बन्धी राष्ट्रसंघीय नियोगले बुधबार बहुमतका आधारमा सो प्रस्ताव पारित गरेको हो । विश्व स्वास्थ्य संगठनले गाँजालाई खतरनाक लागुऔषधको सूचीबाट हटाउन सिफारिस गरेको थियो ।

भियनामा सम्पन्न नियोगको वार्षिक सम्मेलनमा गाँजाजन्य वस्तुलाई खतरनाक लागुपदार्थको सूचीबाट हटाउने प्रस्तावमा २७ देशले समर्थन जनाएका थिए भने २५ देशको विपक्षमा मत परेको थियो । प्रस्तावको पक्षमा मतदान गरेका देशमध्ये नेपाल पनि रहेको जनाइएको छ।
अन्य पक्षराष्ट्रमा अमेरिका, बेलायत, दक्षिण अफ्रिका, अस्ट्रेलिया, फ्रान्स, इटाली, जर्मनी, भारत लगायत छन्। जापान, इराक, ब्राजिल, चीन, रूस, पाकिस्तान लगायतले भने विपक्षमा मतदान गरेका थिए।

राष्ट्रसंघको ’सिंगल कन्भेन्सन अन नार्कोटिक ड्रग्स १९६१’ अनुसार गाँजालाई खतरनाक लागुपदार्थको सूचीमा राखिएको थियो । पछिल्लो निर्णयअनुसार अब यसलाई औषधिजन्य गुण भएको र कम खतरनाक लागुपदार्थको सूचीमा वर्गीकरण गरिएको छ ।