अखबार नेपाल ट्रेन्डिङ

काठमाडौं: काठमाडौ महानगरपालिकाले स्वयम्भूलाई हनुमान ढोका दरवार क्षेत्रका सम्पदासँग जोड्न २ हजार २ सय मिटर दुरीको सम्पदा मार्ग निर्माणको गुरुयोजना तयार पारेको छ ।

महानगरपालिकाले बिहीबार विश्व सम्पदा दिवसको अबसरमा गुरु योजना सार्वजनिक गर्ने जनाएको छ । विश्व सम्पदामा सूचिकृत हनुमानढोकादेखि स्वयम्भूसम्मको पदमार्ग गूरुयोजनासँगै काठमाडौको सम्पदा पदमार्ग स्वयम्भूसम्म जोडिने भएको हो ।

हनुमानढोका हुँदै काष्ठमण्डप, मरुगणेस्थान, मरुहिटी हुँदै सन्तानेश्वर महादेव, मरुबहि, मिच्या गल्लीहुँदै सम्पदामार्ग घोषणा गरेको छ । त्यस्तै बन्जा हिटी, दमाइ टोल हुँदै सुन्ता गल्ली पाछै गल्ली हुँदै नरदेवी निस्कने मार्गपनि यसमा समेटिएको छ । नरदेवीबाट आयुर्वेद अस्पताल हुँदै लोकेश्वर गल्ली, बुराखेल, म्येछ्योंहिटी र तप्यँताको मार्ग तय गरिएको छ ।

रञ्जीतमल्ल सत:घाट, भेलु महादेव, डल्लु चौतारा, भिमसेन मन्दिर, धिमे ल्वोहँ, चाराहिटी र भुँइखेल हुँदै स्वयम्भू सम्मको सम्पदा मार्ग कायम गरिएको छ । दुइ हजार २ सय मीटरको दुरीमा २० वटा लिच्छवि र मल्लकालिन सम्पदा अवलोकन गर्न सकिने महानगरपालिकाले जनाएको छ ।