अखबार नेपाल ट्रेन्डिङ

काठमाडौं: नेपालीहरुको महान् चाड दशैं मनाउनका लागि उपत्यकाबाट बाहिरिनेको संख्या बढ्दै गएको छ ।

विगतका वर्षहरुमा जस्तो काठमाडौं उपत्यका छाड्नेहरुको चाप र चहलपहल नभए पनि घटस्थापनादेखि गाउँ जानेहरुको संख्या भने केही दिनदेखि बढ्न थालेको छ ।

अहिले दैनिक २१ हजारको हाराहारीमा यात्रु बाहिरिने गरेका महानगरीय ट्राफिक प्रहरी महाशाखाले जनाएको छ ।

फूलपातीसम्म बाहिर जानेको संख्या बढ्दै जाने र भित्रिनेको संख्या कम हुँदै जाने महाशाखाले जनाएको छ ।

गएका वर्षहरुमा दशैं सुरु हुनुभन्दा अगाडिदेखि नै बजारमा किनमेल गर्ने, गाउँघर जाने र काठमाडौं छिर्नेको भीडभाड हुने गर्दथ्यो ।

कोरोना महामारीका कारण यो वर्ष गाउँघर फर्कने र उपत्यका छिर्नेको संख्या पनि तुलनात्मक रुपमा कम छ ।

काठमाडौं उपत्यका भित्रिने र बाहिरिने यात्रुको संख्या कम भएकाले अग्रीम टिकट बुकिङ्ग भने नखुल्ने भएको छ ।