अखबार नेपाल ट्रेन्डिङ

काठमाडौं: नेपालका लागि हुन्डाईको आधिकारिक विक्रेता लक्ष्मी इन्टरकन्टिनेन्टल प्रालिले डिजिटल प्लेटफर्मको माध्यमबाट नेपाली बजारमा हुन्डाईको नयाँ जेनेरेसन क्रेटा लन्च गरेको छ ।

नयाँ हुन्डाई क्रेटा विभिन्न ६ भेरिएन्टमा उपलब्ध हुनेछ । डिजेल इन्जिनमा यो ई र एस भेरिएन्टमा उपलब्ध हुनेछ । यसको मूल्य क्रमशः ४३ लाख ९६ हजार र ५४ लाख ९६ हजार रुपैयाँ रहेको छ ।

त्यसैगरी पेट्रोल इन्जिनमा यो ईएक्स, एस, एसएक्स भेरिएन्टमा उपलब्ध हुनेछ । एसएक्समा पनि पेट्रोल र सीभीटी पेट्रोल गरी दुई अप्सन हुनेछ । पेट्रोल इन्जिनयुक्त हुन्डाई क्रेटा ईएक्सको मूल्य ४८ लाख ९६ हजार, एसको मूल्य ५२ लाख ९६ हजार, एसएक्सको मूल्य ५९ लाख ९६ हजार र एसएक्स सीभीटी पेट्रोलको मूल्य ६५ लाख ९६ हजार रुपैयाँ तोकिएको छ ।

हालै उपलब्ध नयाँ हुन्डाई क्रेटाको डिजेल र पेट्रोल दुवै इन्जिनमा १.५ लिटरयुक्त बीएस ६ इन्जिन छ । डिजेल इन्जिनले ११५ पीएस पावर र २५५ एनएम टर्क जेनेरेट गर्छ भने पेट्रोल इन्जिनले ११५ पीएस पावर र १४७ एनएम टर्क जेनेरेट गर्छ । सो गाडीको ग्राउन्ड क्लियरेन्स १९० एमएम छ भने १०.२५ इन्चको टचस्क्रिन इन्फोटेनमेन्ट सिष्टम छ । विभिन्न ७ कलरमा नयाँ जेनेरेसनको हुन्डाई क्रेटा नेपाली बजारमा उपलब्ध भएको छ ।

नयाँ हुन्डाई क्रेटाको फ्रन्टमा नयाँ थ्रीडी क्यास्केड ग्रिल, नयाँ डिजाइनको ठूलो एलईडी हेडल्याम्प, नयाँ स्प्लिट एलईडी डीआरएल, बुल बार शेप सिल्भर क्लेडिङको साथमा नयाँ बम्पर र नयाँ फगल्याम्प हाउजिङ समावेश गरेको छ । सो फ्लोटिङ रुफ डिजाइन, १७ इन्च डायमन्ड कट अलोय ह्विल र हेडल्याम्पको डिजाइनसँग मिल्ने नयाँ एलईडी टेलल्याम्पको साथमा उपलब्ध छ ।