अखबार नेपाल ट्रेन्डिङ

काठमाडौं: ग्लोबल आइएमई बैंक लिमिटेडका नवनियुक्त प्रमुख कार्यकारी अधिकृत रत्नराज बज्राचार्यले २०७७ भाद्र १ गते सोमबार आफ्नो पदभार ग्रहण गर्नुभएको छ ।

ग्लोबल आइएमई बैंकका अध्यक्ष चन्द्रप्रसाद ढकालले सोमबार बिहान एक कार्यक्रमबीच बज्राचार्यलाई पद तथा गोपनियताको सपथ गराएसंगै बज्राचार्यले बैंकको प्रमुख कार्यकारी अधिकृतको रुपमा आफ्नो पदभार ग्रहण गर्नुभएको हो ।

बैंकमा आयोजित कार्यक्रममा बोल्दै अध्यक्ष ढकालले उहाँ एक अब्बल बैंकर हो र ग्लोबल आइएमई बैंकले अहिलेको बैंकिङ्ग क्षेत्रको चुनौतिलाई सफलतापूर्वक सम्पन्न गर्न सक्ने नेतृत्व पाएको बताउनुभयो ।

यसअघि बैंक मर्जर र मर्जरपछिको व्यवस्थापनमा बज्राचार्यले खेलेको भूमिका सराहनीय रहेको र अबका दिनमा पनि बैंकलाई देशकै सबैभन्दा उत्कृष्ट र सबल बैंकको रुपमा स्थापित गर्न बज्राचार्यको भूमिका रहने छ साथै बैंकले बज्राचार्यलाई दोस्रो कार्यकालका लागि पाउनु एउटा अवसर रहेको ढकालले बताउनु भयो ।

कार्यक्रममा बोल्दै बज्राचार्यले ग्लोबल आइएमई बैंक जनता बैंकसंग मर्जरपछि धेरैजसो सूचकहरुमा देशकै ठूलो र एउटा उत्कृष्ट बैंकको रुपमा रहेको र यसलाई थप उचाइमा पुर्याउनुका साथै बैंकको सेवालाई ७७ वटै जिल्लामा विस्तार गरी सबैका लागि बैंक भन्ने मूल नारालाई साकार पार्ने गरी काम गर्ने बताउनु भयो ।

बैंकको सञ्चालक समितिको २०७७ श्रावण ३० गते शुक्रबार बसेको बैठकलेबज्राचार्यलाई आगामि चार वर्षका लागि प्रमुख कार्यकारी अधिकृत नियुक्त गरेको थियो ।चार दशक भन्दा बढी समय बैंकिङ्ग क्षेत्रमा रहनुभएका बज्राचार्यले यसअघि एक कार्यकाल ग्लोबल आइएमई बैंकमा प्रमुख कार्यकारी अधिकृतको रुपमा नेतृत्व गरिसक्नु भएको छ ।

नेपाल राष्ट्र बैंकबाट आफ्नो बैंकिङ्ग करियर सुरुगर्नुभएका बज्राचार्यको बैंक तथा वित्तीय संस्थाहरुको मर्जर तथा मर्जरपछिको व्यवस्थापनमा राम्रो अनुभव रहेको छ । वरिष्ठ चार्टर्ड एकाउण्टेण्ट बज्राचार्यले यस अघि एनसीसी बैंक र सनराइज बैंकमा पनि प्रमुख कार्यकारी अधिकृतको रुपमा नेतृत्व गरिसक्नुभएको छ ।