अखबार नेपाल ट्रेन्डिङ

काठमाडौं: देशभर विभिन्न ठाउँमा सोमबार रातिदेखि भारी वर्षा भएको छ ।

न्यून चापीय रेखा नजिक भएसँगै नेपालमा वर्षाको मात्रा बढ्दै गएको जल तथा मौसम विज्ञान विभागले जनाएको छ ।

बाढी सूचना केन्द्रका अनुसार इलाम, झापा र मोरङमा भारी वर्षा भएपछि सम्भावित बाढी, पहिरो र डुबानको जोखिमबाट जोगिन त्यस क्षेत्रका मानिसलाई एसएमएसमार्फत सूचित गरिएको छ ।

भारी वर्षापछि मेची, विरिङ, निन्दा, कन्काई, चिसाङ खोला, मावा-रतुवा, लोहन्द्रा, बक्राहा, नुनखोला र अन्य साना खोलामा बाढी आउन सक्ने ठानिएकाले सतर्क रहन आह्वान गरिएको छ ।

यस्तै कैलाली र कञ्चनपुरका धेरैजसो स्थानमा भारी वर्षा भएपछि त्यस क्षेत्रका कान्द्रा, मोहना, घुराहा, खुट्टिया, स्याउली, चौधरलगायतका नदीमा बाढीको खतरा रहेपछि त्यस क्षेत्रमा पनि एसएमएस मार्फत ‘अलर्ट’ गराइएको छ ।

बुटवलको तिनाउ नदी बाढी मापन केन्द्रमा पनि जलसतह सतर्कता तह पार गरेपछि कञ्चनखोला र तिनाउ खोलाको तल्लो तटीय क्षेत्रका बासिन्दालाई एसएमएसमार्फत सूचित गरिएको छ ।

बुधबार र बिहीबार एकैसाथ देशभर दुई वटा मौसमी प्रणाली सक्रिय भएपछि मुलुकभर भारी र अति भारी वर्षाको पूर्वानुमान गरिएको मौसमविद्ले जनाएका छन् । उनीहरूका अनुसार हाल देशभर मनसुनी वायुको प्रभावसँगै नेपालको तराई भू-भाग नजिक मनसुनी न्युन चापीय रेखा अवस्थित छ । यसैको प्रभावले वर्षा भइरहेको हो ।

मौसमविद्हरूका अनुसार ५० मिलिमिटरभन्दा माथिको वर्षालाई भारी वर्षा भनिन्छ भने सय मिलिमिटरभन्दा धेरै वर्षा भएमा धेरै भारी वर्षा भनिन्छ । यस अर्थमा बुधबार र बिहीबार धेरै भारी वर्षाको सम्भावना रहेको बताईएको छ ।