अखबार नेपाल ट्रेन्डिङ

धनगढी: सुदूरपश्चिम प्रदेशमा असार पहिलो सातासम्म करिब २२ प्रतिशत धान रोपाईंको काम सकिएको छ । समयमै मनसुन भित्रिएसँगै असार पहिलो सातासम्म सुदूरपश्चिम प्रदेशमा ४० हजार २ सय ४४ हेक्टर क्षेत्रफलमा रोपाई‌ भइसकेको जनाइएको छ ।

सुदूरपश्चिम प्रदेशका नौ वटै जिल्लामा एक लाख ८१ हजार ६ सय ४ हेक्टर क्षेत्रफलमा धानखेती हुँदै आएको छ । क्षेत्रीय कृषि निर्देशनालय, दीपायलका अनुसार असार पहिलो सातासम्म २२ प्रतिशत क्षेत्रफलमा रोपाईं सकिएको जनाएको छ ।

यस वर्ष समयमै मनसुन सक्रिय भएका कारण छिटो रोपाईं सुरु भएको र आकाशे पानीको भर पर्नुपर्ने ठाउँहरूमा पनि रोपाईं चलिरहेको क्षेत्रीय कृषि निर्देशनालयका निर्देशक यज्ञराज जोशीले बताए । प्रदेशका नौ जिल्लामध्ये असार पहिलो सातासम्म सबैभन्दा कम रोपाईं कैलाली र कञ्चनपुरमा भएको छ । कञ्चनपुरमा ४८ हजार ३ सय ७५ हेक्टर क्षेत्रफलमा धान खेती हुने गरेकोमा असार पहिलो सातासम्म ७ हजार २ सय ५६ हेक्टरमा रोपाईं भएको छ ।

त्यस्तै कैलालीमा ७१ हजार ७ सय १५ हेक्टर क्षेत्रफलमा धान खेती हुने गरेकोमा अहिलेसम्म १२ हजार १ सय ९२ हेक्टरमा मात्र रोपाईं भएको र अहिलेसम्म सबैभन्दा बढी रोपाईं ७ हजार २ सय २० हेक्टरमा धानखेती हुने बाजुरामा पनि ३ हजार २ सय ४९ हेक्टरमा रोपाईं सकिएको जोशीले बताए । त्यस्तै, यसपालि मनसुन चाँडो भित्रिएका कारण रोपाईं पनि चाँडो सुरु हुने भएकाले धान उत्पादनमा वृद्धि हुने कृषि निर्देशनालयले जनाएको छ ।