अखबार नेपाल ट्रेन्डिङ

काठमाडौं: नेपाल विज्ञापन संघ (आन)ले आफ्नो ३०औँ वार्षिकोत्सवको उपलक्ष्यमा नेपाल मेडिसिटी अस्पतालसँगको सहकार्यमा सचिवालय परिसर शान्तिनगरमा रक्तदान कार्यक्रमको आयोजना गरी मनाएको छ ।

कार्यक्रममा काठमाडौँ महानगरपालिका वडा नं ३१ का वडा अध्यक्ष नारायण प्रसाद भण्डारीले रक्तदान कार्यक्रमको सफलताको कामना गर्दै कोविड-१९ का कारण असहज परिस्थितिकाबीच पनि रक्तदान जस्तो महत्वपूर्ण कार्यक्रमको आयोजना गरी आफ्नो सामाजिक दायित्व पूरा गरेकोमा संघको प्रशंशा गरे । यसका साथै योगिक समाज नेपालका अध्यक्ष पुरुषोत्तम अधिकारीले पनि योग ध्यान र खानपानमा ध्यान पुर्याउन सके कोविड–१९ बाट जोगिनका लागि सहज हुने बताए ।

आनका अध्यक्ष रबिन्द्र कुमार रिजालले कोविड-१९ को बीचमा पनि जनहितका यस्ता कार्यक्रम गर्न पाउँदा आफूलाई खुशी लागेको बताए । कार्यक्रममा आनका वर्तमान पदाधिकारी तथा सदस्य र एड क्लव अफ नेपालका पदाधिकारी एवं विज्ञापन व्यवसायसँग सम्बन्धित विभिन्न साझेदारहरूको पनि उपस्थिति थियो । उक्त रक्तदान कार्यक्रममा ३० पिन्ट रगत संकलन गरिएको छ ।