अखबार नेपाल ट्रेन्डिङ

काठमाडौं: बिराटनगरमा जारी पाँचौँ महिला साफ च्याम्पियनसिप अन्तर्गत आज सेमिफाईनलका खेलहरु हुँदै छन् । आज हुने पहिलो सेमिफाईनलमा नेपालले श्रीलंकाको सामना गर्दैछ ।

समुह चरणका दुई वटै खेलमा शतप्रतिशत नतिजा निकाल्दै सेमिफाइनलमा पुगेको नेपाल अपराजित रहँदै फाइनलको यात्रा तय गर्ने मनस्थितिमा रहेको छ । नेपाल समुह ए को बिजेता बन्दै समिफाईनल प्रवेश गरेको हो भने श्रीलंका समूह बी को उपबिजेता हो । तुलनात्मक रुपमा नेपालभन्दा श्रीलंकालाई केही कमजोर टीमका रुपमा लिइएको छ तर सेमिफाईनल खेल भएकाले बिपक्षीलाई पनि बलियो रुपमा हेरिएको प्रशिक्षक हरि खड्काले बताएका छन् । यसअघि ५ पटक आमने सामने भएका नेपाल र श्रीलंकाबीचको सबै खेलमा नेपालले जित हासिल गरेको छ ।

पहिलो पटक साफ च्याम्पियनसिपको उपाधि उचाल्ने लक्षसहित बिराटनगर पुगेको नेपाली टोली आजको खेलका लागि शारीरिक र मानसिक रुपमा अब्बल रहेको प्रशिक्षक खड्काको दावी छ । यस्तै आज नै हुने दोस्रो सेमिफाईनलमा ४ पटकको उपाधि बिजेता भारत र बंगलादेशले प्रतिस्पर्धा गर्दैछन् । विराटनगरस्थित सहीद रंगशालामा नेपाल र श्रीलंका बीचको खेल विहान ११ बजे सुरु हुनेछ भने भारत र बंगलादेशबीचको खेल अपरान्ह ३ बजे सुरु हुनेछ ।