अखबार नेपाल ट्रेन्डिङ

रामेछाप: रामेछापको खाँडादेवी गाउँपालिका-१ राकाथुमको खोलाघारी गाउँ शिल गरिएको छ । मंगलबार कोरोना पोजेटिभ पुष्टि भएका खाँडादेवी १ राकाथुमको खोलाघारीका एक युवकको घर भएको खोलाघारी गाउँ बुधबार विहानैबाट शिल गरिएको जिल्ला प्रशासन कार्यालय रामेछापका प्रमुख जिल्ला अधिकारी रुद्रा देवी शर्माले बताए । २३ बर्षका ति युवकमा कोरोना भएको सरकारले हिजो पुष्टि गरेको थियो ।

काठमाडौंमा बस्दै आएका ति युवक लकडाउनको समयमा गत चैत्र ११ गते आफ्नो गाउँ आएर झन्डै २ महिना घरमा बसेर बैशाख ३० गते काठमाडौं फर्केका थिए । लामो समय घरमा बसेर फर्केका युवकको परिवारका सदस्य सहित अन्य १५ जनाको स्वाव परिक्षणका लागि आज नै टेकु पठाइएको स्वास्थ्य कार्यालय रामेछापका प्रमुख जितेन्द्र कर्णले बताए ।

उक्त क्षेत्रमा अहिले प्रहरी परिचालन गरिएको छ । खोलाघारीका करिव १० घर भएको क्षेत्रमा प्रहरीले शिल गरेको र स्वाब परिक्षणका लागि नमुना संकलनको काम भइरहेको खाँडादेवी गाउँपालिकाका अध्यक्ष प्रेम तामाङ्गले जानकारी दिए ।