अखबार नेपाल ट्रेन्डिङ

काठमाडौं: विश्वभर महामारीको रुप लिएको कोराना भाईरस संक्रमणबाट नेपाल पनि प्रभावित बनेको छ । कोरोना भाइरस नियन्त्रणका लागि नेपाल सरकारले लकडाउन घोषणा गरेको एक महिना पुगेको छ । यस विषम परिस्थितिमा लकडाउनबाट प्रभावित एवं अलपत्र भएकाहरुलाई पश्चिम ठमेल पर्यटन परिषद्ले सहयोग गर्दै आएको छ ।

विशेष गरि पश्चिम ठमेलमा दैनिक ज्यालादारी गर्दै आएका मजदुरहरुको हितमा ध्यानमा राख्दै परिषद्ले राहत एवं सहयोग कार्यक्रम घोषणा गरेको परिषद्का अध्यक्ष सन्तोष पाँडेले बताए । देशभर लकडाउन सुरु भईसकेपछि प्रत्येक शनिबार सो क्षेत्रमा सरसफाई गर्दै आएको पनि अध्यक्ष पाँडेले बताए । परिषद्को संयोजकत्वमा सरसफाईका साथै सो क्षेत्रलाई स्यानिटराइज्ड गरिएको पनि उनले बताए ।

लकडाउन सुरु भईसकेपछि अस्पतालहरुमा रगतको अभाव नहोस् भन्दै हालै रक्तदान कार्यक्रमको आयोजना गरिएको परिषद्का सहकोषाध्यक्ष राजेन्द्र कुँवरले बताए । परिषद्ले काठमाडौं महानगरपालिका-१६ को कालधारा, पकनाजोल, क्षेत्रपाटी र सोह्रखुट्टे क्षेत्रका सडक बालबालिका, ज्याला मदजुरी गर्ने मजदुर र भाडामा बस्नेहरुलाई बिहान बेलुका खानाको व्यवस्था गरिएको पनि कुँवरले बताए । हाल प्रत्येक छाक दुई सय जनासम्मलाई खाना खुवाइँदै आएको उनले बताए ।

पश्चिम ठमेल पर्यटन परिषद्का सदस्य एवं जुनेली नेपाल, साइक्लिङ ग्रुप तातोखाना, लकलन्सेस, काठमाडौं महानगरपालिका-१६ र अन्य दाताहरुको सहयोगमा प्रत्येक शनिबार राहत वितरण कार्य पनि गर्दै आइरहेको परिषद्का अध्यक्ष पाँडेले बताए ।