अखबार नेपाल ट्रेन्डिङ

उदयपुर: उदयपुरमा कोरोना भाइरस संक्रमित भेटिएपछि जाँच तीव्र पारिएको छ । २४ जना सङ्क्रमित पुगेको उदयपुरको त्रियुगा नगरपालिका-३ भुल्के र आसपासका क्षेत्रमा थप व्यक्तिको कोरोना परीक्षणका लागि उपकरण पनि अभाव भएको छ ।

भुल्के र त्रियुगा क्षेत्रमा कोरोनाको सङ्क्रमण तीव्ररुपमा फैलँदै गएपनि सबै स्थानीय नागरिकको स्वाब नमूना सङ्कलन गर्न आवश्यक उपकरणको अभाव हुँदा समस्या भएको जिल्ला स्वास्थ्य कार्यालय उदयपुरले जनाएको छ । भुल्केमा ६ सय ५० जना बसोबास गर्छन् । तर अहिलेसम्म प्रदेश जनस्वास्थ्य विभागबाट ६९ र नेपाली सेनाबाट २ सय ५० गरी ३ सय १९ जनाको मात्र स्वाब नमुना संकललन गरिएको जिल्ला स्वास्थ्य कार्यालय उदयपुरले जनाएको छ । ३ सय १९ जनाको स्वाब नमुना परीक्षण गर्दा २४ मा सङ्क्रमण देखिएका कारण अन्य स्थानीय बासिन्दाको पनि स्वाब संकलन गर्नुपर्ने स्वास्थ्य कार्यालयको भनाई छ ।

कोरोना भाइरसको ‘हटस्पट’ बनेको उदयपुरसँग सिमाना जोडिएको खोटाङको हलेसी तुवाचुङ नगरपालिकाले नाकामा हुने आवतजावतमा रोक लगाएको छ । छिमेकी जिल्लासँगै एक वडाबाट अर्को वडामा ओहोरदोहोर गर्न समेत रोक लगाउन सबै वडालाई पत्राचार गरिएको जनाईएको छ । १० स्थानीय तह रहेको जिल्लामा अहिलेसम्म गरिएको र्याकपिड डायग्नोष्टिक टेष्टमा सबै ९२ जनाको रिर्पोट नेगेटिभ देखिएको जिल्ला स्वास्थ्य कार्यालय खोटाङले जनाएको छ ।

र्याकपिड डायग्नोष्टिक टेष्टमा नेगेटिभ रिर्पोट देखिएका हलेसी तुवाचुङ नगरपालिकाका पाँच र दिक्तेल रुपाकोट मझुवागढी नगरपालिकाका तीन जनाको पिसीआर टेष्ट गर्न नमूना संलन गरेर कोशी अस्पताल विराटनगर पठाइएको स्वास्थ्य कार्यालयले जनाएको छ ।