अखबार नेपाल ट्रेन्डिङ

कैलालीः कोरोना भाइरस संक्रमणको जोखिम बढेपछि भारतसँग सीमा जोडिएका कैलालीको १ सय १ किलोमिटर क्षेत्रलाई अहिले पूर्णरुपमा सील गरिएको छ । भारतीय क्षेत्रबाट लुकीछिपी हुनसक्ने ओहोरदोहोरलाई नियन्त्रण गर्न सशस्त्र प्रहरीले अस्थायी र स्थायी गरी कैलालीका ८२ ठाउँमा पोष्ट खडा गरेपछि लुकीछिपी नेपाल प्रवेश गर्ने क्रम रोकिएको छ ।

सरकारले लकडाउनको घोषणा गरेपनि धेरै नेपाली तथा भारतीयहरु मुख्य नाका नभई चोरीको बाटो प्रयोग गदै नेपाल आउने क्रम रोकिएको थिएन । चोरीको बाटो ओहोर हुन थालेपछि सीमा क्षेत्रका नागरिक पनि चिन्तित थिए । अहिले सरकारले पूरै नाकामा सशस्त्र प्रहरीलाई परिचालन गरेपछि मानिसहरु आउने क्रम रोकिएको छ ।

कैलालीमा अस्थायी र स्थायी गरि अहिलेसम्म ८२ स्थानमा टेण्ट र सेन्ट्री स्थापना गरेर दिनरात सीमामा निगरानी सुरु गरेको शसस्त्र प्रहरी बल ३४ नम्बर गण कैलालीले जनाएको छ । यसअघि कैलालीको सीमा क्षेत्रमा ४ वटा बोर्डर आउट पोष्ट र एउटा गुल्म गरी पाँच पोष्टले पूरै सीमा हेर्नुपर्ने अवस्था रहेको थियो ।