अखबार नेपाल ट्रेन्डिङ

काठमाडौं: विश्वभर महामारीको रुप लिएको कोरोना भाइरस संक्रमण नियन्त्रणका लागि नेपाल सरकारले देशभर लकडाउन घोषणा गरेको एक महिना पूरा भएको छ । कोरोना भाईरस संक्रमण रोकथाम र नियन्त्रणको लागि सरकारले गत चैत ११ गते मंगलवारदेखि देशभर लकडाउन घोषणा गरेको थियो ।

सरकारले बैशाख १५ गतेसम्म लकडाउन कायमै राखेको छ । त्यसपछि के गर्ने भन्ने कुनै निर्णय गरिएको छैन । यो बीचमा ३६ हजारभन्दा बढी व्यक्तिको कोरोना परीक्षण गरिएको सरकारले जनाएको छ । ती मध्ये ८ हजार ७ सय ६४ जनाको पिसिआर परीक्षण गरिएको हो भने २७ हजार ९ सय ५६ जनामा आरडिटी परीक्षण गरिएको जनाएको छ ।

परीक्षण गरिएका मध्ये देशभर ४२ जना कोरोना संक्रमित भेटिएका छन् । स्वास्थ्य तथा जनसंख्या मन्त्रालयका अनुसार नेपालमा मंगलबारसम्म ३६ हजार ७ सय १९ जनाको परीक्षण गरिएको छ । जसमध्ये हाल देशभर ७ हजार ६७ जना क्वारेन्टाइनमा रहेका छन् भने १ सय ७ जना आइसोलेसन कक्षमा रहेका छन् । संक्रमित चार जना उपचापछि निको भएर घर फर्किएका छन् ।

सरकारले एक साताका लागि भनेर शुरु गरेको लकडाउनको अवधि एक महिना पुगेपनि जुन गतिमा मानिसहरुको परीक्षण गरेर मुलुकलाई विस्तारै खुकुलो बनाउने दिशामा कदम चाल्नु पर्दथ्यो त्यस्तो देखिएको छैन । एक महिनासम्म पनि सरकारले आवश्यक स्वास्थ्य सामग्री र औषधि नै ल्याउन सकेको छैन । स्वास्थ्य सामग्री खरिदमा भएको अनियमितता प्रकरणपछि सरकारले अहिले नेपाली सेनामार्फत् सामान झिकाउने प्रयास गरिरहेको छ ।

लकडाउनले सर्वसाधारण र ज्याला मजदुरी गरी खाने वर्ग समस्यामा परेका छन् । लामो बन्दले रोजगारी गुमाएर कामविहीन भएकाहरु काठमाडौंमा बस्न नसकेर पैदलै आ–आफ्ना गृहजिल्ला फर्केको कहालीलाग्दो दृष्य देखिएका छन् । गाडी नपाउने, खानेकुरा नपाउने र पैदलै हिड्दा पनि सुरक्षाकर्मीहरुले ठाउँठाउँमा रोक्ने जस्ता हर्कत ब्यहोर्नुपरेको गुनासो उनीहरुले गरिरहेका छन् । केही दिनयता भने कतिपय गाउँपालिकाहरुले आ–आफ्ना क्षेत्रका मतदातालाई उद्धार गरेर लैजान थालेका पनि छन् ।

लामो समय बन्द लम्बिँदा आर्थिक अवस्था ठप्प भएको छ भने त्यसले व्यक्तिको मात्र नभई देशकै अर्थतन्त्रमा ठूलो असर पर्न थालिसकेको छ । कृषिदेखि, उद्योग, कलकारखाना, विकास निर्माणका सबै काम ठप्प छन् । दैनिक श्रम गरेर गुजारा गर्नुपर्ने वर्ग सबैभन्दा बढी मारमा परेका छन् ।