अखबार नेपाल ट्रेन्डिङ

काठमाडौं: केही दिनयता नेपालमा दैनिकजसो कोरोना संक्रमित थपिइरहेका छन् । वीरगन्जमा एकैसाथ तीन जनामा कोरोना संक्रमण पुष्टि भएको भोलिपल्टै सोमबार अन्य दुई जनामा यस्तो संक्रमण देखिएको छ भने यसको संख्या अरू बढ्ने संकेत देखापरेका छन् ।

यसैकारण यो महामारी रोकथाम तथा बिरामीको उपचारका लागि स्वास्थ्य तथा जनसंख्या मन्त्रालयले आफ्ना रणनीति थप परिस्कृत र परिमार्जन गरेको जनाएको छ । स्वास्थ्य तथा जनसंख्या मन्त्री भानुभक्त ढकालले कोरोना संक्रमण रोकथाम तथा नियन्त्रणका लागि आफ्नो मन्त्रालयले ६-टीको फर्मुला (सूत्र)का आधारमा रणनीति अघि बढाएको जानकारी दिएका हुन् ।

सरकारले अघि सारेका ६ सूत्रः

१‍. पहिलो टी अर्थात् ट्राभल रेस्ट्रिक्सनः
यो भनेको आवतजावत बन्द गर्नु हो । यस अन्तर्गत बाहिरी मुलुकबाट नेपाल भित्रिने सबै किसिमका मार्ग बन्द गरिएका छन् भने नेपालभित्र पनि लकडाउन गरिएको छ । यो अवस्थामा विदेशबाट नेपाल भित्रिएका व्यक्ति क्वारेन्टिनमा रहन जरुरी छ । जसले गर्दा संक्रमण भएको भए एक व्यक्तिबाट अर्को व्यक्तिमा नसरोस् । हाल विश्वका धेरैजसो देशले यही रणनीति अपनाएका छन् र यो प्रभावकारी पनि साबित भएको छ। लकडाउनले सर्वसाधारणमा केही असहजता त भएको छ, तर देशलाई संक्रमणबाट बचाउन यो अपरिहार्य छ ।

२. दोस्रो टी अर्थात् टेस्टिङः
यस अन्तर्गत स्थानीय तह, प्रदेश सरकार र संघीय सरकारले व्यवस्था गरेका क्वारेन्टिनमा रहेका सबै व्यक्तिको नमुना (स्वाब) परीक्षण गर्ने र होम क्वारेन्टिनमा रहेकाहरूको पनि आवश्यकता अनुसार नमुना परीक्षण गर्ने नीति लिइएको छ । कुन व्यक्तिलाई कस्तो खालको परीक्षण गर्ने र कति अवधिमा गर्ने भन्ने विषयमा स्वास्थ्य विज्ञका सुझाव अनुसार मन्त्रालयले कार्यविधि बनाई व्यवस्थित गरेको छ । यसको उद्देश्य परीक्षण दायरा बढाई धेरैभन्दा धेरै व्यक्तिको नमु्ना परीक्षण गर्नु हो ।

३. तेस्रो टी अर्थात् ट्रेसिङः
यो भनेको संक्रमित व्यक्तिका परिवार, नजिकका व्यक्ति तथा संक्रमितसँग नजिकको सम्पर्कमा आएकाहरू पत्ता लगाई परीक्षणको दायरामा ल्याउनु हो । धेरैजसो संक्रमितको ट्रेसिङ सकिएको मन्त्री ढकालले बताए । पछिल्लो समय पहिचान भएका संक्रमितको पनि ट्रसिङ भइरहेको उनले जानकारी दिए । यो काम इपिडिमियोजलोजी तथा रोग नियन्त्रण महाशाखाले व्यवस्थित रूपमा गरिरहेको छ ।

४. चौथो टी अर्थात् ट्रयाकिङः
सम्भावित संक्रमित र संक्रमित व्यक्तिले एक ठाउँबाट अर्को ठाउँमा आवतजावत गरेका भएमा त्यो एकिन गरी उनीहरूलाई आइसोलेसनमा राख्न अनुगमन गर्ने विधि हो यो । यसका लागि स्वास्थ्य मन्त्रालय मातहतबाट खटिएका टोली, उच्चस्तरी समिति एमसीसी, तथा स्वास्थ्य मन्त्रालयद्वारा सञ्चालित फोन सेवा, मोबाइल एप र वेबसाइट मार्फत ट्रेकिङलाई थप व्यवस्थित गरिएको छ । यसलाई अझ व्यवस्थित गर्न व्यक्तिहरू क्वारेन्टिनमा रहे/नरहेको अनुगमन गर्नुपर्ने हुन्छ । यसका लागि स्वास्थ्य मन्त्रालयले आफ्नो संयन्त्र परिचालन गरिसकेको छ भने स्थानीय तथा प्रदेश सरकारका जनप्रतिनिधि, सुरक्षाकर्मी, सञ्चारकर्मी, र सम्बन्धित सबै सरोकावालालाई यसमा सहयोग, समन्वय र सहकार्य गर्न मन्त्रालयले आग्रह गरेको छ ।

५. पाँचौ टी अर्थात् ट्रिटमेन्टः
संक्रमण पुष्टि भएका व्यक्तिको उपचार जारी छ भने सम्भावित संक्रमितको संख्या आकलन गरी योजनाबद्ध तरिकाले उपचार व्यवस्था मिलाउन स्वास्थ्य मन्त्रालयले रणनीति बनाएको छ । कोरोना संक्रमितको उपचारका लागि काठमाडौं उपत्यका तथा बाहिरका विभिन्न अस्पताल तोकिएका छन् । कोरोना संक्रमण सम्बन्धी सम्पूर्ण उपचार सरकारले निःशुल्क गर्ने प्रबन्ध मिलाएको छ । अन्य आकस्मिक र निरन्तर उपचारका क्रममा रहेका बिरामी समस्यामा नपरुन् र उनीहरूलाई सर्वसुलभ रूपमा सेवा प्रवाह होस् भन्ने विषयमा पनि मन्त्रालय गम्भीर रहेको मन्त्री ढकालको भनाइ छ । यस महामारीको घडीमा के सरकारी, के गैरसरकारी सबै किसिमका अस्पतालबाट उपचार गर्नुपर्ने हुन्छ । त्यसैले देशभरका सबै किसिमका अस्पताल सञ्चालन गर्ने योजनासाथ मन्त्रालय तयारी अवस्थामा रहेको उनले जानकारी दिए । यसमा सबै पक्षको सहयोगको अपेक्षा मन्त्रालयले गरेको छ ।

६. छैठौं टी अर्थात् टुगेदरः
मन्त्री ढकालका अनुसार कोरोनाको सम्भावित महामारी रोक्न स्वास्थ्य मन्त्रालय मात्र होइन, सिंगो देश नै लागिपरेको छ । उच्चस्तरीय समिति, सीसीएमसीदेखि स्वास्थ्य तथा जनसंख्या मन्त्रालयसम्म विभिन्न तहमा कमिटी बनाई कोरोना संक्रमण रोकथाम तथा नियन्त्रण अभियान व्यवस्थित रूपमा भइरहेको उनले जानकारी दिए । साथै अन्य मन्त्रालय तथा निकायमा समेत विषयगत समिति सक्रिय रहेको उनले बताए। यसमा स्वास्थ्यकर्मी, सुरक्षाकर्मी, अत्यावश्यक दैनिक उपभोग्य वस्तु व्यवस्था गर्ने, सरकारी तथा गैरसरकारी संघ/संस्था तथा सञ्चारमाध्यमलगायत सबै मिलेर मात्र कोरोनाविरुद्धको लडाइँ जित्न सकिने मन्त्रालयले जनाएको छ ।