अखबार नेपाल ट्रेन्डिङ

काठमाडौं: विश्वभर महामारीको रुपमा फैलिएको कोरोना भाइरसको संक्रमणको त्रासकाबीच युरोपेली देशहरुले नेपालमा रहेका आफ्ना नागरिकहरु फिर्ता लैजान चार्टर विमान पठाउने भएका छन् । फ्रान्स र जर्मनीले आफ्ना देशका नागरिक लैजान चार्टर विमान काठमाडौं पठाउन लागेका हुन् ।

नेपाल नागरिक उड्डयन प्राधिकरणका अनुसार सम्भवतः शुक्रबार केही युरोपेली देशका जहाज काठमाडौं आइपुग्ने छन् । जर्मन नागरिकलाई लैजानका लागि कतार एयरवेजका दुई विमान चाटर्ड गरिएको छ । शुक्रवार र शनिवार ति विमानहरुले नेपालमा रहेका जर्मन र अन्य युरोपेली मुलुकका नागरिकलाई लैजाने तयारी गरिएको छ ।

युरोप फर्किन चाहनेलाई जर्मन दूतावासको वेवसाइटमा रहेको फर्म भर्न आह्वन गरिएको छ । अहिले जर्मन र फ्रेन्च नागरिक गरी करिब ७ सय जना काठमाडौंमा छन् । नेपालमा रहेका व्यक्तिका परिवारको विशेष चासोपछि उनीहरुलाई स्वदेश फिर्ताको वातावरण बनाउन लागिएको हो ।

यस्तै, संयुक्त राज्य अमेरिका, अस्ट्रेलिया, जापान र दक्षिण कोरियाले पनि नेपालमा रहेका आफ्ना नागरिक फिर्ताका लागि चार्टर विमान पठाउने तयारी गरेका छन् । तर, ती देशबाट कुन मितिमा विमान आइपुग्छ भन्ने विषय भने टुंगो लागेको छैन ।

लकडाउनका कारण नेपालका विभिन्न स्थानमा फसेका पर्यटकको उद्दार शुरु गरिएको छ । नेपाल पर्यटन बोर्डका अनुसार बिहीबार बिहानैबाट पर्यटकको उद्दार शुरु गरिएको जनाएको छ । लुक्लाबाट बिहीबार चार्टर्ड गरिएको विमानमा फ्रेन्च, जर्मन तथा अन्य यूरोपेली मुलुकका नागरिक तथा पोखराबाट विभिन्न स्थानबाट पनि उनीहरुलाई काठमाडौं ल्याउने तयारी गरेको पर्यटन बोर्डले जनाएको छ ।

सम्बन्धित मुलुकले आफ्नो व्यवस्था गरी स्वदेश नर्फकाएसम्म यसरी उद्दार गरिएका पर्यटक काठमाडौंका विभिन्न होटेलमा बस्नेछन् । केही पर्यटकलाई विमानस्थल नजिकका होटेल र केहीलाई ठमेलमा राख्ने व्यवस्था गरिएको नेपाल पर्यटन बोर्डले जनाएको छ ।