स्थानीय तह निर्वाचनका लागि महानगर र उपमहानगरको भागबण्डा भोलिसम्म टुंग्याइने
वि.सं.२०७९ वैशाख ४ आइतवार १४:४०
काठमाडौं: सत्तारुढ गठबन्धनका दलहरुले स्थानीय तहको निर्वाचनका लागि महानगरपालिका र उप-महानगरपालिकाको भागबण्डाबारे भोलिसम्म टुंगो लगाइसक्ने निर्णय गरेका छन् ।
आइतबार प्रधानमन्त्री निवास बालुवाटारमा बसेको गठबन्धन दलका शीर्ष नेताहरुको बैठकले महानगरपालिका र उपमहानगरपालिकाको भागबण्डा सोमबारसम्म टुंगो लगाइसक्ने निर्णय गरेको हो ।
गठबन्धनको दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को सचिवालयका अनुसार बाँकी सबै प्रदेशमा निर्वाचनको तयारी र गठबन्धनको अवस्थाबारे कार्यदलको रिपोर्ट लिने निर्णय समेत भएको छ ।
महानगर र उपमहानगरपालिका बाहेकका स्थानीय तहको भागबण्डाबारे टुंग्याउन आइतबार दिउँसो कार्यदलस्तरमा छलफल हुने गठबन्धन दल राष्ट्रिय जनमोर्चाका नेता हिमाल पुरीले जानकारी दिए ।
कार्यदलले बाँडफाँटका विषयमा आवश्यक निर्णय गरिसकेपछि उक्त निर्णय शीर्ष नेताहरुलाई पेस गरिने छ ।
वि.सं.२०७९ वैशाख ४ आइतवार १४:४०