अखबार नेपाल ट्रेन्डिङ

काठमाडौं: नेपालगन्जमा एकै दिन १५ जनामा कोरोना भाइरसको संक्रमण भेटिएपछि त्यहाँका पुरै बजार सिलबन्दी गरिएको छ । नेपालगन्जको डिएसपी रोड निवासी ६० वर्षिय एक पुरुषमा कोरोना संक्रमण देखा परेको थियो । उनी ‘अजान’ गर्न पुग्ने महेन्द्र पार्कस्थित मस्जिद तथा मदरसा वरिपरीका स्थानीय बासिन्दाको स्वाब परीक्षण गर्दा एकै दिन १५ जनामा पुष्टी भएपछि नेपालगन्ज पूरै सिलबन्दी गरिएको जनाईएको छ ।

शनिबार दिउँसो डिएसपी रोड क्षेत्रमा अन्य ब्यक्तिमा पनि संक्रमण फैलाएको आशंकामा ७ जना र महेन्द्र पार्क आसपासका ८३ गरी कुल ९० जनाको स्वाब संकलन गरिएको थियो । ती मध्येबाट १५ जनाको रिपोर्ट पोजिटिभ आएको थियो । सुरुमा ९ जना र त्यसपछि थप ६ जनामा कोरोना संक्रमण पुष्टी भएको थियो ।

६० वर्षिय संक्रमितले दुई महिनाअघि भारत पुगेर आएको बयान दिएका छन् । उनी भारतबाट आएपछि पनि मस्जिद तथा मदरसामा नियमित रुपमा जाने गरेका थिए । महेन्द्रपार्क आसपास मुस्लिम समुदायको बाहुल्यता रहेको ठाउँ हो । पहिलो संक्रमितलाई खजुरास्थित सुशील कोइराला प्रखर क्यान्सर अस्पतालमा स्थापना गरिएको आइसोलेसन कक्षमा राखिएको छ ।