अखबार नेपाल ट्रेन्डिङ

रामेछापः कोरोना भाइरस नियन्त्रणका लागि सरकारले लागु गरेको लकडाउनको समयमा रामेछापका ब्यापारीहरुले दैनिक उपभोग्य सामानको अस्वभाविक मूल्य बृद्धि गरेका छन् । मूल्य बृद्धिका कारण सर्वसाधारण मारमा परेका छन् ।

सदरमुकाम मन्थली लगायतका जिल्लाका सबै बजारमा दैनिक उपभोग्य सामग्रीको ब्यापारीहरुले अस्वभाविक रुपमा मुल्यबृद्धि गराएका कारण आफुहरु मारमा परेको उपभोक्ताहरुले गुनासो गरेका छन् । दैनिक उपभोग्य बस्तुहरु चामल, तेल, चिनी, चिउरा, गेडागुडी लगायतका सामग्रीहरुमा मूल्य बृद्धि भएको छ ।

उत्पादन गर्ने कम्पनीले नै मूल्य बृद्धि गरेका कारण केहि सामग्रीमा मूल्य बृद्धि भएको रामेछाप उद्योग वाणिज्य संघका अध्यक्ष केशव घिमिरेले अखबार नेपाललाई बताए । मूल्य बृद्धि गरेको पाइएमा त्यस्ता व्यापारीहरुलाई कडा कारवाहि गरिने रामेछापका प्रमुख जिल्ला अधिकारी रुद्रादेवी शर्माले बताए । उनले अहिले मन्थली बजारमा अनुगमनलाई तिव्रता दिएको समेत जानकारी दिए ।