अखबार नेपाल ट्रेन्डिङ

बारा: आइतबार राति विनाशकारी हावाहुरीबाट बारा, पर्सा लगायतका जिल्लामा भएको ठूलो धनजनको क्षतिप्रति प्रदेश २ को मन्त्रिपरिषदले गहिरो दुःख व्यक्त्त गर्दै मृतकका परिवारलाई ३ लाख रुपैयाँ तत्कालीन राहतस्वरुप प्रदान गर्ने निर्णय गरेको छ ।

आज बिहानै बसेको प्रदेश २ सरकार मन्त्रिपरिषदको आकस्मिक बैठकले आइतबार राति बारा र पर्साका विभिन्न ठाउँमा असिनापानीसँगै आएको हावाहुरीमा परी मृत्यु भएकाको परिवारलाइ तत्काल ३ लाख रुपैयाँ राहतस्वरुप प्रदान गर्ने निर्णय गरेको हो । त्यस्तै घाइतेहरुको उपचार खर्च प्रदेश सरकारले व्यहोर्ने र घरबार गुमेकाहरुको बासस्थानका लागि प्रदेश सरकारले पहल गर्ने निर्णय समेत प्रदेश २ को मन्त्रिपरिषद्ले गरेको छ ।

आइतबार साँझ वर्षासँगै आएको हावाहुरीले बारा र पर्सामा ज्यान गुमाउनेको संख्या ३५ जना पुगेको छ भने पाँच सय भन्दा बढी घाइते छन् । घाईतेहरुको बारा र पर्साको विभिन्न अस्पतालहरुमा उपचार हुँदैछ । घटनास्थलमा नेपाली सेना, नेपाल प्रहरी र सशस्त्र प्रहरीको टोली उद्धार कार्यमा खटिएका छन् । उपचारको क्रममा अस्पतालमा रगतको अभाव भएका कारण घाईतेहरुको उपचारमा रगतको कमी हुन नदिन रक्तदानको अव्हान समेत गरिएको छ ।