अखबार नेपाल ट्रेन्डिङ

काठमाडौं: परीक्षा अगावै प्रश्नपत्र बाहिरिएपछि प्रदेश नम्बर २ को एसईई परीक्षा यसै महिना सञ्चालन गर्ने गरी स्थगित भएको छ । चैत्र १० गतेदेखि सुरु भएको एसईईमा बिज्ञान विषयको परिक्षा रद्द भएको थियो भने सामाजिक विषयको परीक्षा पनि स्थगित भएको थियो ।

प्रश्नपत्र एकदिन अघि नै बाहिरिन थालेपछि शिक्षा मन्त्रालयमा छलफल गरी शिक्षामन्त्री गरिराजमणि पोखरेलले प्रदेश नम्बर २ को परीक्षा स्थगित गर्न निर्देशन दिएका हुन् । प्रश्न पत्र बाहिरिएको विषयमा राष्ट्रिय परिक्षा बोर्डले यसअघिनै अनुसन्धान सुरु गरिसकेको छ भने मन्त्रालयले अनुसन्धानका लागि नेपाल प्रहरीको केन्द्रीय अनुसन्धान ब्यूरो (सीआईबी)लाई दिएको छ ।

परीक्षा अघि नै प्रश्नपत्र बाहिरएको घटना आपराधिक गतिविधि भएको मन्त्री पोखरेलको भनाई छ । त्यसैगरी शिक्षाविद् विद्यानाथ कोइरालाले परीक्षामा सहभागी हुनुपर्ने समयमा विद्यार्थीले सडकमा आउनु दुःखद रहेको भन्दै तीन तहको सरकारबीच समन्वय अभाव काकारण परीक्षा नै भद्रगोल भएको टिप्पणी गरेका छन् । प्रदेश नम्बर २ बाहेक अन्य ६ वटा प्रदेशको परीक्षा भने यथावत हुनेछ । परीक्षा स्थगित भएसँगै प्रदेश-२ का करिब ७२ हजार विद्यार्थीमा प्रत्यक्ष असर परेको छ ।