प्रधानमन्त्री केपी शर्मा ओली र भारतीय समकक्षी नरेन्द्र मोदीले आज विराटनगरस्थित एकीकृत जाँच चौकीको उद्घाटन गर्दै
वि.सं.२०७६ माघ ७ मंगलवार ०९:१२
काठमाडौं: प्रधानमन्त्री केपी शर्मा ओली र भारतीय समकक्षी नरेन्द्र मोदीले आज ‘भिडियो कन्फ्रनेन्स’मार्फत एकैसाथ मोरङको विराटनगरस्थित एकीकृत जाँच चौकी (आइसीपी) उद्घाटन गर्दैछन् । भारतले एक अर्ब १४ करोड रुपैयाँ लागतमा यो जाँचचौकी निर्माण गरिदिएको हो ।
भारतले निर्माण सम्पन्न गरेको जाँचचौकीलाई दुवै देशका प्रधानमन्त्रीले एकैसाथ स्वीच थिचेर उद्घाटन गर्ने भएका हुन् । प्रधानमन्त्री केपी शर्मा ओलीले काठमाडौँ र भारतीय समकक्षी नरेन्द्र मोदीले दिल्लीबाट आज एकै समयमा ‘स्वीच अन’ गरी चौकीको शुभारम्भ गर्ने कार्यक्रम रहेको छ । ओली र मोदीले स्वीच थिचेर उद्घाटन गरेपछि नेपालबाट सामान बोकेको ट्रक भारततर्फ र त्यहाँबाट नेपालतर्फ ट्रक भित्रने छ ।
भारतको सिमाना नजिकै एक सय २९ विघा क्षेत्रफलमा जाँचचौकी निर्माण गरिएको हो । भारततर्फको जाँचचौकी भने दुई पहिले नै तयार भइसकेको छ । नेपालतर्फ बनेको जाँचचौकी भारतले केहि दिनअघि नै हस्तान्तरण गरिसकेको छ । यो जाँचचौकी निर्माण गर्न नेपालले भारतसँग सन् २००६ मै सम्झौता गरेको थियो । तर सन् २०१६ देखि मात्र भारतले जाँचचौकी निर्माण थालेको थियो ।
निर्माण थालेको झण्डै पाँच बर्षपछि भारतले नेपाललाई आइसीपी हस्तान्तरण गरेको हो । आज प्रधानमन्त्री ओली र भारतीय समकक्षी मोदीले उद्घाटन गरेपछि यसअघि विराटनगर भन्सार कार्यालयबाट हुने गरेका सबै कारोबार यही जाँचचौकीबाट हुनेछ । यो जाँचचौकी भएर शुरुमा मालबाहक सवारी आवतजावत गर्ने र क्रमशः यात्रुवाहक सवारी तथा रेलको सामान समेत आयात निर्यात गर्ने पूर्वाधार विकास गरिँदैछ ।
जाँचचौकीमा कार्गो, यात्रु टर्मीनल भवन, मुद्रा सटही सुविधा, इन्टरनेट, क्वारेन्टाइन, कोल्ड स्टोरेज, क्लियरिङ एजेन्ट, बैंक, सीसीटीभी, पार्किङ, रेस्टराँलगायत सार्वजनिक सुविधायुक्त संरचनाहरु निर्माण गरिएको छ ।
वि.सं.२०७६ माघ ७ मंगलवार ०९:१२