अखबार नेपाल ट्रेन्डिङ

एजेन्सीः चीनमा देखिएको नयाँ कोरोना भाइरस अरु देशमा पनि फैलिएको पुष्टि भएको छ । हाल यो भाइरसबाट तीन जनाको मृत्यु भईसकेको छ । चीनभन्दा बाहिर जापान, थाइल्याण्ड र दक्षिण कोरियामा पनि यो भाइरसबाट संक्रमित भएका व्यक्तिहरुको घटना सार्वजनिक भएको अन्तर्राष्ट्रिय सञ्चारमाध्यमहरुले जनाएका छन् ।

नयाँ वर्षको लागि लाखौँ चिनियाँ नागरिक घुम्न गएका बेला यो भाइरस फैलिएको अनुमान छ । चीनमा मात्रै एक हप्तामै यो भाइरसका बिरामी तेब्बर सङ्ख्याले बढेको पाइएको छ । हुवान शहरमा मात्र देखिएको यो भाइरसको सङ्क्रमण अरु शहरमा पनि फैलिएको हो । हुवानमा मात्रै अहिले दुई सयभन्दा धेरै बिरामी रहेका र श्वासप्रश्वास सम्बन्धी समस्या भएका बिरामी बेइजिङ, शङ्घाई र सेनजेनमा समेत भेटिएको बताइएको छ । निमोनिया गराउने कोरोनोभाइरसको नयाँ प्रजाति मानिसबाट मानिसमा सर्ने चीनले यसअघि नै पुष्टि गरिसकेको छ ।

अहिलेसम्म उपचारमा संलग्न १४ जना स्वास्थ्यकर्मीलाई पनि यो भाइरस सरेको स्थानीय सञ्चारचारमाध्यमले जनाएका छन् । ‘सि फुड’ पाइने बजारबाट यो भाइरस मानिसमा सरेको भनिए पनि यसबारे वैज्ञानिकले अनुसन्धान गरिरहेका छन् । कोरोना भाइरसका कारण सामान्यतया सङ्क्रमित व्यक्तिहरुमा रुघा, खोकीको लक्षण देखिन्छ र यसको असर गम्भीर हुँदै जाँदा ज्यान पनि जान सक्छ ।