अखबार नेपाल ट्रेन्डिङ

रामेछाप: उमाकुण्ड गाउँपालिकाको वडास्तरीय अनिवार्य तथा नि:शुल्क शिक्षा घोषणा कार्यक्रम अन्तर्गत आज उमाकुण्डको वडा नम्बर ५ मा सम्पन्न भएको छ ।

कार्यक्रमका प्रमुख अतिथि तथा उमाकुण्ड गाउँपालिका अध्यक्ष शेर बहादुर सुनुवारले शिक्षामा धेरै काम गर्दैछौं तर मुल्यांकन गरेका छैनौं । शिक्षाबाट नै समाज परिवर्तन हुने भएकाले बालबालिकालाई  शिक्षाबाट बञ्चित नगराउनमा जोड दिए । शिक्षाको गुणस्तर राम्रो भएमा मात्र बालबालिकाको संस्कार राम्रो हुने बताउँदै पालिका अध्यक्ष सुनुवारले शिक्षा दिएमा मात्र बालबालिकाको भविष्य सकारात्मक हुने बताए ।

कार्यक्रमको अध्यक्षता गरेका उमाकुण्ड गाउँपालिका वडा नम्बर ५ का वडा अध्यक्ष कुल बाहादुर बस्नेत ‘बिकास’ले सरोकारवालाहरुले आ-आफ्नो ठाउँबाट शिक्षाको निम्ति लागि परेको बताउँदै कम्तीमा ४ वर्ष देखि १३ वर्षसम्मका बालबालिकाहरुलाई खोजी खोजी विद्यालयमा ल्याई भर्ना गराउन भूमिका खेल्ने प्रतिवद्धता व्यक्त गरे । त्यसैगरी सरस्वती माविका प्रधानाध्यापक कल्याण कुमार सुनुवारले उमकुण्ड ५ का विद्यार्थी मात्रै यस विद्यालयमा अध्ययन गरिरहेको बताए ।

त्यस्तै उमाकुण्ड ५ का नेपाली काङ्ग्रेस सभापति महेश भण्डारीले नि:शुल्क शिक्षाको लागि नेपाली काङ्ग्रेसले मुख्य भूमिका खेलेको बताए । नि:शुल्क शिक्षा पाउनु बालबालिकाको अधिकार भएको बताउँदै बालिबालिकालाई शिक्षाबाट बञ्चित नगराउन आग्रह गरे । त्यसैगरी सरस्वती माविका विद्यालय व्यवस्थापन समितिका अध्यक्ष प्रवीन कुमार सुनुवारले सबै बालबालिकाका शिक्षाबाट गरिब भए भन्दैमा बञ्चित गराउन नहुने धारणा व्यक्त गरे ।