अखबार नेपाल ट्रेन्डिङ

खोटाङः दिक्तेल रुपाकोट मझुवागढी नगरपालिका–१० पाथेका नाखामकी ३६ वर्षकी पबित्रा तामाङको हत्या अभियोगमा प्रहरीले दिक्तेल रुपाकोट मझुवागढी नगरपालिका–१२ जालपाका ३३ वर्षीय दिपक श्रेष्ठ र उनकी श्रीमती २५ वर्षकी सृजना राईलाई पक्राउ गरेको छ ।

कर्तव्य ज्यान मुद्धामा फरार प्रतिवादी दम्पत्तीलाई जिल्ला प्रहरी कार्यालय खोटाङले बुधबार पत्रकार सम्मेलन गरेर सार्वजनिक गरेको छ । प्रतिवादीलाई ललितपुर महानगरपालिका–३ बोजेपोखरीबाट पुस ११ गते पक्राउ गरिएको जिल्ला प्रहरी कार्यालय खोटाङका डिएसपी पुरुषोत्तम खड्काले बताए । श्रेष्ठलाई तामाङको हत्या गरी गरगहना लुटपाट गरेको तथा श्रीमती राईलाई श्रीमानले गरेको अपराध ढाकछोपमा मतियारका रुपमा सघाएको आधारमा पक्राउ गरिएको प्रहरीले जनाएको छ ।

प्रतिवादीलाई जिल्ला प्रहरी कार्यालयमा लगेर म्याद थप गरी अनुसन्धान कार्य अघि बढाइएको प्रहरीले जनाएको छ । गत मंसिर १९ गते राती ८ बजेपछि घरबाट हराएकी तामाङ पुस ३ गते अन्दाजी तीन सय मिटर टाढा रहेको बर्खे गोठमा शंकास्पद अवस्थामा मृत फेला परेकी थिईन् । उनको शव पात्लेको पत्करले छोपिएको अवस्थामा फेला परेको थियो । अनुसन्धानका क्रममा बिहे गर्नु अगाडिदेखि नै श्रेष्ठ र तामाङबीच सम्पर्क रहेको खुलेको छ ।

ससुरालीमा जेठान दाईको विहेमा जानका लागि अनलाइन सपिङ गरेको सामानको पैसा जुटाउनका लागि श्रेष्ठले तामाङको हत्या गरेको देखिएको डिएसपी खड्काले जानकारी दिए । अनलाइन सपिङको सामान लिन मंसिर १९ गते दिक्तेल पुगेका श्रेष्ठ सामान नलिइ घट्ना घटाएर मात्रै राती घर पुगेको खुलेको छ । तामाङको लुटिएको सुन सहकारीमा लगेर राखेर पैसा जुटाएपछि श्रेष्ठ श्रीमती लिएर ससुराली सुंदेल पुगेका थिए । मंसिर २५ गते बाक्सिलामा खाना खाएका अभियुक्त दम्पत्ती घर पुगेर मंसिर ३० गते काठमाडौं पुगेको देखिएको प्रहरीले जनाएको छ । तामाङ चार छोरीकी आमा हुन् ।