अखबार नेपाल ट्रेन्डिङ

विराटनगर: कोशी प्रदेशका मुख्यमन्त्री केदार कार्कीले मागेको विश्वासको मतमाथि विभाजन सुरू भएको छ । मत विभाजनका लागि सभामुखको आसनको दायाँ र बायाँ हस्ताक्षरका लागि टेबुलको व्यवस्था  गरिएको छ ।

बुधबार प्रदेशसभामा पेश गरेको विश्वासको मतको प्रस्तावको छलफलका क्रममा उठेका प्रश्नको जवाफ दिएपछि प्रदेशसभामा मत विभाजनको प्रक्रिया सुरू भएको हो । बैठकमा मुख्यमन्त्री केदार कार्कीले  प्रदेशसभा नियमावली २०७४ को नियम १२८ बमोजिम विश्वासको मत लिने प्रस्ताव सदनसमक्ष राखेका थिए ।

९३ जना प्रदेसभा सांसद रहेको प्रदेशसभामा मुख्यमन्त्रीलाई विश्वासको मत लिन ४७ सांसदको समर्थन चाहिन्छ । तर, कार्कीलाई गठबन्धनबाट विद्रोही गरेर गएका शेखर कोइराला पक्षका कांग्रेसका ८ र एमालेका ३९ जना प्रदेशसभा सदस्यको समर्थन छ । मुख्यमन्त्री कार्कीलाई नेपाली कांग्रेस, माओवादी केन्द्र, जसपाले विश्वासको मत दिने निर्णय गरेका छन् ।

कोसी प्रदेशसभामा एमालेका ४० (उपसभामुखसहित),कां ग्रेसका २९, नेकपा माओवादी केन्द्रका १३, राष्ट्रिय प्रजातन्त्र पार्टीका ६,नेकपा एकीकृत समाजवादीका ४ र जसपाका १ जना सांसद छन् ।

कार्की नेतृत्व कोसी प्रदेश सरकार गठन प्रक्रियामा राप्रपामा तटस्थ छ । गठबन्धनबाट विद्रोह गरेका कांग्रेसका ८ र एमालेका ३९ जना प्रदेशसभा सदस्यको समर्थनमा कार्की गत शनिबार प्रदेशको मुख्यमन्त्री बनेका हुन् ।  कार्कीले आइतबार पद तथा गोपनीयताको शपथ लिएका हुन् । मुख्यमन्त्री कार्कीले एमालेका रामबहादुर राना र कांग्रेसका शम्शेर राईलाई मन्त्रीसमेत नियुक्त गरेका छन् । कार्की संविधानको धारा १६८ को उपधारा ५ बमोजिम मुख्यमन्त्री नियुक्त भएका हुन् ।