ढुंगेल र दाहालबीच प्रतिस्पर्धा हुने आँकलन, ६ बजेदेखि मतदान
वि.सं.२०८० असोज ११ बिहीवार १५:३८
काठमाडौं: नेकपा एमाले बागमती प्रदेशको अधिवेशन अन्तर्गतको निर्वाचन आज ६ बजेको लागि तय भएको छ । मंगलबारबाट सुरु भएको प्रदेश अधिवेशनले ५ पदाधिकारीसहित २४५ जनाको कार्यसमिति चयन गर्नेछ ।
अहिले उम्मेदवारको विरोधमा उजुरी, उजुरीउपर छानबिन निर्णय, उम्मेदवारको नामावली प्रकाशन, उम्मेदवारी फिर्तालगायतको कार्यक्रम चलिरहेको छ । ४ बजे उम्मेदवारको अन्तिम नामावली प्रकाशन गरिसकेपछि ६ बजे निर्वाचन हुने जनाइएको छ ।
प्रदेश कमिटीको अध्यक्ष पदमा ४ जनानको उम्मेदवारी गरेको छ । रामेछापका कैलाश ढुंगेल, मकवानपुरका कृष्णप्रसाद दाहाल, केशरबहादुर बुढाथोकी र सानुकुमार श्रेष्ठको उम्मेदवारी परेको छ । सचिवमा ४ र उपसचिवमा १२ जनाको उम्मेदवारी परेको छ ।
प्रदेशको अध्यक्षका लागि उम्मेदवारी दर्ता गराएका निवर्तमान अध्यक्ष केशवराज पाण्डेले आफ्नो उम्मेदवारी फिर्ता लिएका छन् । उनले हिजो वारेसनामा मार्फत उम्मेदवारी दर्ता गराएका थिए । तर नेतृत्वले पार्टीमा महत्वपूर्ण जिम्मेवारी दिने सहमति गरेपछि पाण्डेले आफ्नो उम्मेदवारी फिर्ता लिन सहमति जनाएको एमाले निकट स्रोतले जनाएको छ ।
पाण्डेले उम्मेदवारी फिर्ता लिएसँगै अध्यक्षका आकाँक्षीको संख्या ४ जनामा झरेको छ । उम्मेदवार ४ जना भएपनि मुख्य प्रतिस्पर्धा रामेछापका ढुंगेल र मकवानपुरका दाहालबीच हुने आँकलन गरिएको छ । मनोनयन फिर्ता लिएका पाण्डेले पनि ढुंगेल पक्षलाई समर्थन जनाएको स्रोतले बताएको छ ।
अध्यक्षका प्रत्यासी ढुंगेल एमालेमा अध्यक्ष केपी शर्मा ओली निकट मानिन्छन् । ओलीले नै ढुंगेललाई सर्वसम्मत रुपमा अध्यक्ष बनाउन निर्देशन दिएका थिए । तर सर्वसम्मत अध्यक्ष बनाउन सहमति नजुटेपछि निर्वाचन मार्फतनै ढुंगेललाई अध्यक्ष बनाउन ओलीले नेताहरुलाई गोप्य सर्कुलर जारी गरेको स्रोतले बताएको छ । अध्यक्षका प्रत्यासी पाण्डेले पनि समर्थन गरेपछि ढुंगेल पक्ष थप उत्साही बनेको छ । ढुंगेल स्वयंले भने आफ्नो जित निश्चित रहेको दाबी गर्दै आएका छन् ।
वि.सं.२०८० असोज ११ बिहीवार १५:३८