अखबार नेपाल ट्रेन्डिङ

विराटनगर: उपसभामुख सिर्जना दनुवार अनुपस्थित भएपछि सोमबार डाकिएको कोशी प्रदेशसभाको कार्यव्यवस्था परामर्श समितिको बैठक स्थगित गरिएको छ ।

बैठकको अध्यक्षता गर्ने अध्यक्ष नै नभएको भन्दै दिउँसो १ बजे कार्यव्यवस्थाको अर्को बैठक बस्ने गरी बिहानको बैठक स्थगित भएको हो । सोमबार दिउँसो १ बजे बोलाइएको प्रदेश सभा बैठकमा कोशी प्रदेशका मुख्यमन्त्री उद्धव थापाले विश्वासको मत लिने तयारी गरेका थिए । तर बैठकको अध्यक्षता गरिदिने उपसभामुख दनुवार अचानक अस्वस्थ भएको कारण बैठक स्थगित गरिएको छ ।

उपसभामुख दनुवारले प्रदेश सभामा सभामुख र उपसभामुख नभएको अवस्थामा बैठकको अध्यक्षता गर्न तोकिएको अध्यक्ष मण्डलका सदस्यहरू मध्ये दोस्रो सूचीमा रहेका नेपाली कांग्रेसका इस्राइल मन्सुरीलाई सम्बोधन गर्दै आफु नआउन्जेल बैठकको अध्यक्षता गर्न आग्रह गरेकी छन् ।

सोमबार दिउँसो मुख्यमन्त्री थापाले विश्वासको मत लिने कार्यक्रम भएपछि बिहान ८ बजे कार्यव्यवस्था परामर्श समितिको बैठक बोलाइएको थियो । तर उपसभामुख नै अनुपस्थित भएपछि बैठक विना निश्कर्ष अन्त्य भएको छ ।

प्रदेश सभा सचिवालयले बैठक सञ्‍चालनका बिषयमा कोशी प्रदेशका मुख्य न्यायाधिवक्ता बुद्धिबहादुर कटुवालसँग कानुनी राय लिने तयारी गरेको जनाइएको छ । कार्यव्यवस्था बैठक बस्न नसकेका कारण सोमबारको बैठकको कार्यसूची नै अनिश्चित बनेको छ । कार्यसूची नआउँदा मुख्यमन्त्री थापाले प्रदेश सभाबाट विश्वासको मत लिने कार्य पनि अनिश्चित भएको छ ।

प्रतिपक्षी दल नेकपा एमाले र राप्रपाले भने उपसभामुख दनुवारलाई बैठकमा अनुपस्थित गराउने पूर्वतयारीका आधारमा आफ्ना आठ जना ज्येष्ठ सदस्यहरूलाई सोमबारको बैठकमा अनुपस्थित गराउने रणनीति लिएको छ । सोही आधारमा आठै जनाले आइतबार नै कोशी प्रदेश सभा सचिवालयमा लिखित रुपमा आफ्नो अनुपस्थितिबारे जानकारी गराइसकेका छन् ।