अखबार नेपाल ट्रेन्डिङ

नवलपरासी: पूर्वपश्चिम राजमार्ग अन्तर्गत पूर्वी नवलपरासीका दुई छुट्टाछुट्टै स्थानमा भएको दुर्घटनामा ६ जनाको मृत्यु भएको छ । दुर्घटनामा परी १६ जना घाइते छन् । नारायणढ-बुटवल सडक खण्डको कावासोती नगरपालिका खरकट्टा जंगलमा गएराती कार र ट्रक ठोकिदा पाँच जनाको मृत्यु भएको हो । मृतक सबै कारमा सवार रहेको जिल्ला प्रहरी कार्यालयका निरीक्षक राजेन्द्रप्रसाद अधिकारीले जानकारी दिएका छन् ।

दुर्घटनामा परी पूर्वी नवलपरासीको देवचुली नगरपालिका-१ का दीपक वि.क., वडा नं. ५ का डिलबहादुर ढेंगा मगर र कैलाली धनगढीका सुरज राना मगरको मृत्यु भएको प्रहरीले जानकारी दिएको छ । अन्यको सनाखत हुन सकेको छैन । नारायणगढबाट बुटवलतर्फ जाँदै गरेको लु.१ ख ८५३२ नम्बरको ट्रकसँग कावासोतीबाट नारायणगढतर्फ जाँदै गरेको बा २१ च ६४०९ नम्बरको कारसँग ठोकिएको हो ।

दुर्घटना हुने समयमा हावाहुरीसहित पानी परेको हुनाले तिव्र गतिमा रहेको कारले ओभरटेक गर्ने क्रममा ट्रकसँग ठोकिएर दुर्घटना भएको प्रहरीले जनाएको छ । कार पूर्ण रुपमा क्षतिग्रस्त भएकाले शव निकाल्न दुई घण्टा लागेको प्रहरीले जनाएको छ । त्यसैगरी, मध्यविन्दुनगरपालिकाको अरुणखोला जंगलमा गएराती भएको बस दुर्घटना हुँदा एक जनाको मृत्यु भएको छ । दाङबाट काठमाण्डौंतर्फ जाँदै गरेको ना. ७ ख ८६४२ नम्बरको यात्रुबहाक बस सडकमा अनियन्त्रित भई दुर्घटना भएको हो ।

दुर्घटनामा बसका चालक मकवानपुर हेटौडाका ३५ वर्षिय लक्ष्मण तिमिल्सिनाको मृत्यु भएको प्रहरीले जनाएको छ । तिमिल्सिनाको उपचारका क्रममा भरतपुर अस्पतालमा मृत्यु भएको हो । दुर्घटनामा घाईते १६ जनाको नवलपुर, कालीगण्डकी र भरतपुर अस्पतालमा उपचार भइरहेको छ । घाईते मध्ये केहीको अवस्था गम्भीर रहेको प्रहरीले जनाएको छ ।