देशभर अझै पनि अझै ३ दिन वर्षाको सम्भावना
वि.सं.२०८० वैशाख १७ आइतवार ०८:१८
काठमाडौं: देशभर अझै पनि कम्तीमा ३ दिन वर्षाको सम्भावना देखिएको मौसम पूर्वानुमान महाशाखाकी मौसमविद् गंगा नगरकोटी बताएकी छिन् ।
नगरकोटीका अनुसार पश्चिमी वायु सक्रिय रहेकाले अझै तीन दिन सबै प्रदेशमा वर्षा जारी रहने सम्भावना देखिएको बताईन् । मौसम पूर्वानुमान महाशाखाले सामान्यतया ३ दिनसम्मको मौसम अनुमान गर्नेगर्छ ।
मौसमविद् नगरकोटीका अनुसार अहिले पनि गण्डकी, लुम्बिनी, कर्णाली र सुदूरपश्चिम प्रदेशमा पानी परिरहेको छ ।
यसैबीच काठमाडौं उपत्यकामा आज पनि वर्षाको सम्भावना देखिएको मौसमविद् नगरकोटीले जानकारी दिइन् । ‘आज पनि काठमाडौँ उपत्यकामा वर्षाको सम्भावना छ’, उनले भनिन् ।
उनका अनुसार विगत २० घण्टामा काठमाडौँ उपत्यकामा ४३ मिलिमिटर वर्षा भएको छ । ‘काठमाडौँमा हिजो मध्यम खालको वर्षा भएको छ’, उनले भनिन् । मौसम महाशाखाले आज बिहान ६ बजे आगामी २४ घण्टाका लागि चेतावनी तथा परामर्श जारी गरेको छ ।
जसमा भनिएको छ देशका केही स्थान (देशभर जुनसुकै ठाउँ) मा मेघगर्जन/चट्याङसहित हल्कादेखि मध्यम वर्षाको सम्भावना रहेको हुनाले मेघगर्जन/चट्याङ, हावाहुरीबाट हुन सक्ने क्षति/जोखिमबाट बच्न आवश्यक सतर्कता अपनाउनु हुन अनुरोध छ ।
वि.सं.२०८० वैशाख १७ आइतवार ०८:१८