अखबार नेपाल ट्रेन्डिङ

काठमाडौं: नाबालिग बलात्कारको आरोपमा पक्राउ परेका सन्दीप लामिछानेविरुद्ध पहिलो पटक जिल्ला अदालतबाट ७ दिनको म्याद थप भएको छ ।

न्यायाधीश दण्डपाणि न्यौपानेको इजलासले सन्दीपलाई हिरासतमा राख्न अनुमति दिएको हो । सोमबार बिहान १० बजे नै प्रहरीले सन्दीपलाई अदालतमा पुर्‍याएको थियो ।

पक्राउ परेको पाँचौँ दिनमा प्रहरीले सन्दीपलाई जिल्ला अदालत काठमाडौंमा उपस्थित गराएको थियो । अदालतले पक्राउ परेको मितिबाट ७ दिन थुनामा राख्न अनुमति दिएको छ । सातौँ दिनमा सन्दीपलाई फेरि अदालतमा उपस्थित गराउन भनिएको छ ।

सोमबार बिहान ११ बजे न्यायाधीश इजलासमा उपस्थित भएसँगै सन्दीपको म्याद थप बारे कुरा भएको थियो । त्यसक्रममा सन्दीपका कानुन व्यवसायी पनि अदालतमा पुगेका थिए ।

सन्दीपका कानुन व्यवसायीले जाहेरी र अन्य कागजात हेर्न पाउनु पर्ने माग गरेका थिए । तर न्यायाधीशले जवाफ दिए, ‘ती कागजात म हेरौंला, तपाईंहरुलाई के छ भनौँला ।’

न्यायाधीशले जाहेरी र अन्य कागजात अध्ययन गरिसकेपछि त्यहाँ भएका मूलभुत कुराहरु जानकारी गराएका थिए । सन्दीपका कानुन व्यवसायीले इजलास समक्ष मुद्दाको छिटो टुंगो लगाइदिन आग्रह गरेका छन् ।

सन्दीप राष्ट्रिय क्रिकेट टिमको कप्तानसमेत (निलम्बित) रहेकाले मुद्दाको छिटो टुंगो लागेर निर्दोष ठहरिए करिअरमा फर्किएर राष्ट्रका लागि खेल्ने भएकाले प्राथमिकतामा राखेर छिटो टुंगोमा पुर्‍याइदिन लामिछानेका कानुनी सल्लाहकार सरोजकृष्ण घिमिरेले आग्रह गरे ।

त्यसक्रममा न्यायाधीश न्यौपानेले सन्दीपलाई पनि केही भन्नु छ भनेर सोधेका थिए । सन्दीपले आफू निर्दोष रहेको बताउँदै सुनियोजित रुपमा फसाएको दाबी गरे ।

उनले न्यायाधी समक्ष भने, ‘यो सम्पुर्ण प्रक्रियाबाट मेरो आत्मा सम्मानमा चोट पुगेको छ । चरित्रहत्या गरिएको छ । ममाथि झुटा आरोप लगाइयो । यसको कुनै उपचार छ श्रीमान् ?’

जवाफमा न्यायाधीश न्यौपानेले भने, ‘तपाईंले मुद्दाको सुनुवाइका क्रममा ती कुरा उठाउन सक्नुहुन्छ । आज त म्याद थपको विषय मात्रै हो ।’

बुधबार फेरि अदालतमा उपस्थित गराउने गरी सन्दीपलाई प्रहरीले गौशला बृत्तको हिरासतमा लगेको छ । जिल्ला सरकारी वकिल कार्यालयको रोहबरमा सन्दीपको बयान आइतबारदेखि सुरु भइसकेको छ ।

सन्दीप गत बिहीबार कत्तारको दोहा हुँदै काठमाडौँ फर्किएका हुन् । प्रहरीलाई जानकारी गराएरै आएका उनलाई विमानस्थलबाटै पक्राउ गरिएको थियो ।